Ты памятникым 1979 ий 29 июньышто почыныт. Магнитогорск олан рӱдӧ ужашыштыже верланыше монументын кӱкшытшӧ – 15,6 метр, нелытше – 83 тонн. Тиде – Сеҥымаш триптихын икымше ужашыже, кум памятникым икгай элемент – керде – ушен шога.
Ты памятник трилогийын икымше ужашыжлан шотлалтеш гынат, пытартышлан гана шогалтеныт. Тудо жаплан моло кок монументын авторжо Е.Вучетич ош тӱня дене чеверласен, садлан проектым Л.Головницкий ден Я.Белопольский мучашленыт. «Тыл – фронтлан» монументым арам огыл Магнитогорск олаште вераҥденыт, вет лач ты олаште ыштен лукмо металл дене сарыш колтымо танк-влакым пелыж наре да снаряд-влакын кумшо ужашыжым ямдыленыт.
Монумент кӱкшака верыште шога, тушко кӱ тошкалтышым келыштарыме. Композицийын рӱдӧ ужашыже – пашазын да воинын скульптурышт. Металлургический завод-влак могырыш ончышо пашазе вуй ӱмбакыже нӧлталме кердым воинлан кучыкта, а тудыжо касвел могырыш, сар годым тале кредалмаш-влак лийме верыш, онча.
Монументыш тыгак айдеме кӱкшытан кок трапеций пура. Тушто Кугу Отечественный сар жапыште Магнитогорск гыч Совет Ушем Герой лӱмым налше еҥ-влакын лӱмыштым возымо. 2005 ий 9 майыште монументыш треугольник форман эше кок секцийым ешареныт, тушкыжо ты ола гыч сарыште вуйым пыштыше-шамычын лӱмыштым (чылаже 14 000 наре) серыме.