Кидмастар-влакын пашаштым шымлымеке, южгунамже чылт ӧрат. Мом гына ыштен огыт мошто? Икте моторын пидеш, весе чаткан сӱретла, кумшо тӱрла але урга. Икманаш, кид модеш, иктаж-мом гынат ышта…
Оршанке посёлкышто илыше Елена Рыбакова сӱретлаш моткоч йӧрата. Ты мастарлыкше тудлан моло сферыштат шкенжым сайын ончыкташ полша. Елена текстиль гыч ямдылыме вургемыште але арверыште йодмо почеш могай кӱлеш, тугай сӱретым ямдыла. Нунын идейыштым джинс курткышто, худиште, футболкышто, толстовкышто, сумкаште шыҥдара. Тудын ойлымыж почеш, тидыже тыглай вургемлан у сыным пурташ, иктаж-мо дене локтылалтше верым уэмдаш полша. Елена ты сомылым шке кид дене шукта, тӱрлӧ техникылан огеш эҥерте.
–Профессионально сӱретлаш нигушто тунемын омыл. Авам – моткоч творческий шӱлышан айдеме. Шуко мом ыштен мошта. Очыни, тудымак ончен, мыят творчествылан шӱман кушкынам. Изи годсек сӱретлаш йӧратенам. Ончычшо яра жапым арам эртараш огыл манын, тидым ыштенам. Кушмо семын шонымашем вашталтын, тыге чон йодмо почеш сӱретленам. 2020 ийыште, у йӧнлан эҥертен, вургемыште сӱретлаш кумылаҥынам. Еҥ-влакын йодмышт почеш, нунын вургемыштышт тӱрлӧ палым ончыкташ тӱҥалынам, – каласкалыш мастар ӱдыр.
Тыгак тудо ты идейым илышыш шыҥдараш шукертсек ямдылалтмыж нергенат ойлыш. Тидлан шке соцсетьлаштыже лӱмын увертарымашым вераҥден, пример шотеш икмыняр пашам ончыктен. Еҥ-влак ужыныт да тудын деке йодмаш дене шке лекташ тӱҥалыныт. Тыгак палыме-влакат ышташ йодыныт.
– Мыланем тыглай вургем-влак йокрокла чучыт. Вургемыште сӱретым ышташ интернет сайын полшен. Кидмастар-влакын мастер-классыштышт шинчымашем нӧлтенам, тӱрлӧ видеоуроклан эҥертен, эскизым ямдылаш, могай чиям кучылташ кӱлмым тунемынам. Ончыкыжым тӱрлӧ коваште гыч ямдылыме вургемлаште сӱретлаш шонем. Тидлан тыгак келыше чия да ӱзгар-влак кӱлыт. Кызыт ямдылалтам, тунемам. Тылеч посна киш дене пашам ыштен ончаш кумыл уло. Лишыл жапыште тидын шотышто шинчымашем нӧлташ тӱҥалам манын шонем, – мане тудо.
Елена вургемыште сӱретым вераҥдыме деч ончыч эскизым ямдыла. Вара тудым клиентлан ончыкта, тудыжо келша гын, пашалан пижеш. Тидлан мушмо вургем кӱлеш манеш. Уке гын чия вургемышке сайын огеш воч.
Телым сӱретлаш йодшо-влак шагалын улыт, сандене кидмастар вес йыжыҥыште шкенжым шуара. Ӱдыр икшыве-влаклан ӱпым кылдаш резинкым, школ ден йочасадлан поделкым ыштылеш. Елена тыгак ургаш кумылан. Кок ӱдыржылан тӱрлӧ костюмым ямдыла. Нуныжат авашт семынак творческий шӱлышан кушкыт. Коктынат ургаш туныктымо кружокыш коштыт. Икманаш, Еленан ешыштыже изижге-кугужге мастарлыкым таптат. Тыгак ты кидмастарын пачерысе пырдыжлаштыже турлӧ сӱретым ужаш лиеш. Тудымат Елена шкеак сӱретлен. Ӱдырын ойлымыж почеш, шукыж годым йӱдым пашам ышташ келша. Лач тыгодым оҥай идей-влак толыт, пашажат утларак мотор да илыше гай шочыт.