Морко район Ӱшӱттӱр ялыште илыше Екатерина ден Александр Ивановмыт олаш але посёлкыш илаш куснымо нерген ик ганат шонен огытыл.
У пӧрт чоҥалтеш
Самырык вате-марийлан пӱртӱс лоҥгаште, шып верыште илаш келша. Ончылий нуно ты ялыштак у пӧртым чоҥаш тӱҥалыныт. Кок шочшан ешлан тидлан ава капитал шӱкалтышым ыштен.
Екатерина Изи Кушна ял гыч Ӱшӱттурыш лу ий ончыч марлан толын. Кызыт мӧҥгыштӧ шогылтеш, пелашыже Москош чоҥымо пашаш кудалыштеш. Южгунам тылзылан, кунам гын кум арнялан кая да тынарак мӧҥгыштӧ шога. Самырык еш Александрын шочмо суртыштыжо ачаж дене пырля ила. Ик пачашан у пӧртым тошто воктелан нӧлташ кутырен келшеныт. Пеноблок дене пырдыжлам опташ родо-тукымышт полшеныт. Жап да йӧн лийме семын Александр еш пыжашым чоҥымо пашам эркын дене вораҥдара.
– Ялыште мыланем чыла шотыштат келша: ме моткоч сылне верыште, мотор пӱртӱс лоҥгаште, илена, йырымваш – шып. Тыгай верым коден кайыме ок шу. Кеҥежым икшыве-влак кечыгут гаяк уремыште яндар южышто модын куржталыт, оласе семын пеленышт оролен коштман огыл, – ойла Екатерина.
Ит ӧркане веле
Эрдене кынелын, ава Ярослав ден Каринам школ автобусыш ужата – нуно Зеленогорск школышто тунемыт. Да сурт сомылкалан пижеш. Тыге кас шумымат от шиж, манеш. Пелашыже Москошто гын, тудлан сомыл эшеат шуко логалеш.
Ивановмыт ончыч тӱкан шолдыра вольыкымат ашненыт, но икмыняр ий ончыч пытареныт. Кызыт сурткайыкым гына ашнат.
– Кеҥежым сомыл эшеат шуко. Емыж-саскам погена: шкалан ситышым телылан ямдылена да молыжым ужалена. Ӧрканаш огыл гын, сай оксам ыштен налаш лиеш. Адакшым пакчагӧргыштат пашам ыштен шуктыман. Тидланже Ярослав ден Карина полшат. Телылан пакчасаскам тӱрлӧ рецепт почеш банкылаш шинчалтем, тӱрлӧ салатым ямдылем, – манеш самырык озавате.
Телымат ялыште йокрок огыл, маныт Ивановмыт. Катя сурт сомылкам пытара да кидпашам кучен шинчеш: мочылам, носким пидеш. Карина аваж семынак кидпашалан шӱман кушкеш. Александр тыгак шкаланже сомылым муэш, тудын пелен Ярослават пӧръеҥ пашалан тунем кушкеш.
Еш альбом гыч налме фото-влак.