24 июньышто Йошкар-Оласе Национальный художественный галерейыште Марий Элым Вуйлатыше Ю.Зайцев СВО участник-влак да нунын ешышт дене вашлийын.
– Шукертсек шонен коштмо тӱҥ миссийым шуктынем – доброволец-влаклан боевой действийын ветеранже удостоверенийым кучыктынем. Нимом ончыде, те элнам аралаш эн ончыч каенда, туге гынат шке кумылын кайыше, военнослужащий ден мобилизоватлыме-шамычлан икгай условийым ыштымым – боевой действийын ветеранжылан шотлалтмым – кужу жап вученда. Тендан кокла гыч кажныже ты лӱмым шке сусыржо, тазалыкше, кӧ гын, чаманен каласыман, шке илышыж денат сулен, – ойлен Ю.Зайцев.
Вашлиймаш годым Марий Элым Вуйлатыше толшо-шамычын йодышыштлан вашештен, вара боевой действийын ветеранже удостоверений ден медаль-влакым кучыктен.
Юрий Зайцев Россий Герой, младший лейтенант Анатолий Иванов денат вашлийын да эллан служитлымыжлан тауштен. Кужэҥер кундемын шочшыжо Россий Армийыште – 2001 ий гыч. Чечня Республикыште, Сирийыште, Абхазийыште, Крымыште служитлен. СВО-ш икымше кечылаштак каен. Россий Президент В.Путинын Указше почеш тений 30 майыште А.Ивановлан «Шӧртньӧ Шӱдыр» медальым да Россий Герой лӱмым пуэныт. Тудо тыгак Патырлык орден, «За воинскую доблесть» II степенян медаль дене палемдалтын.
Ю.Зайцевын кӱштымыж почеш, Марий Элыште СВО участник-влакын ешыштлан тӱвыра да патриотизм шӱлышан проект илышыш шыҥдаралтеш. Тудо Марий Элыште да Ленинград областьыште тыгай еш-влаклан полшымо шотышто опытым иктыш ушаш полша.
Проектлан келшышын, Марий Элысе Шочмо элысе воин-влакын ешыштын комитетыштын делегацийже Санкт-Петербургын да Ленинград областьын сӧрал верлаштыже икмыняр кече лийыт. Нуно «йыргешке ӱстел» годым СВО участник-влаклан полшымо, волонтёр толкынышто национальный да тӱвыра ушем-влакын, патриотизм шӱлышеш ончен куштымаште еш поянлыкын верышт нерген кутырат, паша опытышт дене палдарат.
Д.Речкин / Марий Элым Вуйлатышын пресс-службыжын фотожо.