Юлсер кундемыште Мучашъерыште илыше вате-марий Екатерина Арсентьевна ден Алексей Леонидович Кудрявцевмыт шке пашашт дене чапланат, вич икшывым ончен куштат, тыгодым моткоч уста да талантан улыт. Нуно ялын ончыкылыкшо верч азапланен илат, кугезе йӱлам, тӱвырам аклат да пӱртӱсланат шӱман улыт. Марий Элым Вуйлатыше Ю.Зайцев тений кеҥежым шуко шочшан вате-марийлан «За достойное воспитание детей» Почётан знакым кучыктен.
Тӱрлӧ пашам ыштат
Екатерина Арсентьевна Шарача кундемеш шочын-кушкын, Мучашъерышке марлан толын. Профессийже дене тудо историк, Отымбал, Памар школлаште 17 ий туныктен. Кызыт Юлсер кундемысе рӱдӧ клуб системым нылымше ий вуйлата.
Пелашыже Алексей Леонидович «Газпром трансгаз Нижний Новгород» ООН-н Волжскысо филиалыштыже магистральный газпучын линейно-производственный управленийыштыже инженерлан ышта. Тудо тыгак пушеҥге гыч тӱрлӧ арверым пӱчкеден моштышо мастар еҥ. Тидлан шке мастерскойжо уло, тушто келшыше станок-влакым вераҥден. Пу дене тӱрлӧ ӱзгарым, арверым, мебельым ышта. Пашаже-влакым вате-марий тӱрлӧ вере эртаралтше фестивальыш але конкурсыш аклаш луктыт, тыгодым мастер-классымат ончыктат.
Визытынат уста улыт
Вич шочшо – ача-аван кугу поянлыкше. Нунат ача-авам сеҥымаш дене чӱчкыдын куандарат: сайын тунемыт, школысо, районысо, республикысе тӱрлӧ олимпиадыште ойыртемалтыт. Тыгодым кажныже молан-гынат мастар, мом-гынат ыштен мошта.
Эн кугурак Андрей эргышт тений Волгатехым робототехнике да мехатронике направлений дене 4-ше курсым тунем пытарен. Кызыт магистратурыш куснен. Тудо историйлан кумылан рвезе. Йошкар-Оласе «Кречет» исторический реконструкций клубыш нылымше ий коштеш, рыцарь семын кучедалме турнирлашке ушна. Тыште, чодырашке каен, ролевой модыш дене модыт, иктаж-могай заданийым шуктат. Егор МарГУ-што Тӱвыра да тӱвыра кокласе коммуникаций институтышто документоведлан кумшо ий тунемеш. Тудо пианиным сайын шокта. А Софья Кугу Парат школыш 10-шо классыш коштеш. Ӱдыр химий ден биологийым сайын тунемеш, врач лияш шона. Тыгак эше Софья Пызырьгурп клубысо ансамбльыште кушта. Павел Кугу Парат школышто 7-ше классыште, Мирон Отымбал школышто 3-шо классыште тунемыт. Коктынат усталык шӱлышан улыт: Павел сценыште модаш йӧрата, Миронлан мураш келша.
Пӧртым чоҥеныт
Шке кундемыштышт ты еш моло деч поснак ойыртемалтеш: пашаланат кожмак, мураш-кушташ тале улыт, тыгодым тӱрлӧ конкурсыш, фестивальыш кумылын ушнат. Теве 2020 ийыште Кудрявцевмыт «Семья года» Российысе конкурсын «Семья – хранитель традиций» номинацийыштыже сеҥышыш лектыныт. Тушто марий калыкын шуктен толмо йӱлажым, чодыралан шӱман улмыжым почын пуэныт, тӱрлӧ ойӧрӧ дене палдареныт. Но тунам коронавирусын чот шарлымыжлан кӧра вате-марий Москошко каен кертын огытыл. Мӧҥгышкышт толын, нуным саламленыт.
Ты еш ялысе илышым йӧратыше, аклыше. Мучашъерыште чапле пӧртым нӧлтеныт.
– 2010 ийыште ава капитал кӱшеш пу пӧртым чоҥышна. Мотор пӱртӱс лоҥгаште илена. Тораштак огыл чодыра уло.
Йоча-влакым изинек пашалан туныктена. Самостоятельный лийышт, ямдым вучен ынышт шинче манын шонена.
Ешыште ме шинчымашлан тӱҥ верым ойырена. Йоча-влак тунемын моштышт, у шинчымашым налаш ямде лийышт манын тыршена. Элна нерген шукырак пален налышт манын, ме тӱрлӧ верым ончен коштына. Шокшо кундемышкат миен толына.
Кызыт ача-ава-влак йочам ала-кушкат тунемаш колтат. Мыят, пелашемат Йошкар-Олаште шинчымашым налынна, сандене йоча-влакым тышанак кодаш йодына. Паша укелан кӧра ял гыч шукын каят. Тиде таче моткоч кугу шоныш. Мый шочшем-влаклан эре ойлем: «Шканда ялыште пашам кычалза, тышкак пӧртылза, пӧртым нӧлтыза». Шонет гын, тыштат илаш лиеш. Вет кундемыштына паша верым муаш куштылго. Ме Озаҥ, Зеленодольск, Буинск олала коклаште верланенна. Кажне кечын ялна гыч тушко пашаш кошташ лиеш, – мане Екатерина Арсентьевна.
Марий Элым Вуйлатышын Почётан знакшым налшаш верч 20 утла еш материалым аклаш пуэн. Тушеч вич ешым гына ойырен налме. Сеҥыше радамыш логалмылан трукышто ӧрмалгенна, но тыгодым куаныме. Чонышто – кугешнымаш, – мане Е.Кудрявцева.
Почётан знакым кучыктымашке уло ешге толыныт ыле. Екатерина Кудрявцева таумутым шокшын ойлыш. Ты сеҥымаш Кудрявцевмытлан ончыко каяш куатым ешара, тыгаяк тале кодаш ӱшаным пуа.