17-ше мартыште Кужэҥер район Руш Шой кыдалаш школышто «Чон гыч лекше мутем…» вашлиймаш эртаралтын. Тышке Шÿдымарий, Ӱштымбал, Шорсола, Коҥганур да Кужэҥер школла гыч чолга йоча-влак толыныт. Марий тувыран тунемше-влакым ужаш моткоч куанле ыле…
«Кугарня» газет редакцийын пашаеҥже-влак школышто икмыняр секций дене пашам ыштеныт. Икымше секцийыште йоча-влак почеламутым возаш тунемыныт, кокымшышто газет редакцийын пашаж дене палыме лийыныт. Ты секцийыште ÿдыр-рвезе-влак статьям, кÿчык уверым возен онченыт. Тыгак газетнан корреспондентше И.Речкин икшыве-влаклан фотоурокым эртарен. Изирак йоча-влаклан «Марий модыш-влак» секций пашам ыштен. Вашлиймаш волейбол турнир дене пытен. Ты кечын «Кугарня» газетын редакторжо Э.Иманаев ден Руш Шой школын директоржо А.Репин пашам пырля келшен ыштыме шотышто договорым подписатленыт.
И.В.Романова, Кужэҥер районысо образований отделын вÿдышö специалистше:
– Ты кундемыште тÿҥ шотышто марий-влак илат. Руш Шой школысо туныктышо-влак кеч-могай мер я творческий пашалан мелын шогат. Директорын туныктымо да воспитатлыме паша шотышто алмаштышыже Татьяна Васильевна Крылован темлымыж почеш ты школышто республике кÿкшытан инновационный площадкым почынна. Тудо 2019 гыч 2022 ий марте пашам ышта. Тÿҥ шонымаш – этнокультурный пашам виктарен колташ. Тыште тÿрлö мероприятийым эртараш тÿҥалына.
Ты гана вашлиймашна «Кугарня» газетын пашаеҥже-влак дене лийын. Молан манаш гын тиде – самырык-влаклан лектын шогышо газет, коллектившат самырык шÿлышан. Йоча-влакым марла возаш кумылаҥдыме шуэш. Тидым возышо еҥ сайрак ыштен кертеш.
Э.А.Иманаев, «Кугарня» газетын тÿҥ редакторжо:
– «Кугарня» газет редакций лÿм дене тыгай вашлиймашым эртарымылан Кужэҥер районысо Руш Шой школын директоржо Александр Эрнестович Репинлан, уло школ коллективлан, Ирина Валерьевна Романовалан таум каласем. Пагалыме тунемше ден туныктышо-влак! Мемнам тыге порын вашлиймыда, чапле концерт программыда эрелан шарналт кодыт. Ӱшанена: тиде вашлиймаште йочан чонышкыжо пыштыме туто пырче сай саскам пуа.
Фото: Тунемашат кертына, мурен-куштенат моштена!
Руш Шой школышто тунемше-влак моткоч сылне концертым ончыктыктышт.
