Турнявӧчыж бактерийым пытара, кугу температурым волта, сусырым паремда, организмым пеҥгыдемда, витамин дене пойдара, пӱжалтара, шондым луктеш, вӱрым вишкыдемда.
Тромбофлебит, гипертоний годым свежа саскам кок кугу совла дене кечеш кум гана кочмо деч пел шагат ончыч кочман.
Шондыгалташте кӱ улмо да атеросклероз годым 20 грамм свежа саскам да коштымо лышташым термосыш пыштыман, ик стакан шокшо вӱдым темыман да 3-4 шагат шинчыктыман. Лемым пел стакан дене кочмо деч пел шагат ончыч кечеш 2-3 гана йӱман.
Иммунитетым пеҥ-гыдемдаш манын, 1 кг турнявӧчыжым, 1 кг падыштыме олмам, 2 стакан эрыктыме да тыгыдемдыме грецкий пӱкшым иктеш варыман. Ӱмбакыже 2,5 кг сакырложаш да 1 стакан вӱд дене шолтымо сиропым темыман. Вартышым изи тулышто пел шагат шолтыман да банкыш темыман. Ямде эмым эрдене ик кугу совла дене леве вӱд дене подыл кочман.
Цистит годым, тыгак мочеполовой чер деч профилактике шот дене свежа пӧчыж сокым кок кугу совла дене кечеш кок гана кочмо деч пел шагат ончыч йӱман.
Пародонтоз годым лаштыртыме саска дене пӱйшылым кочмо деч вара кечеш кок-кум гана йыгыман.
Свежа турнявӧчыж сокым вӱд дене пелыгыч вараш гын, варикоз йорам мушкаш пайдале.
Шотыш налза! Турнявӧчыжым пагар да нылгыжшоло йора годым кочкаш ок лий. Тыгак турнявӧчыж напиткым сульфониламидный препарат дене пырля йӱман огыл.