Йотэлла гыч тунемаш толшо ӱдыр-рвезе-влак Марий кундемыште шагалын огытыл. Икмыняр ий ончыч, Туркменистанысе Сейдан олажым коден, Лачын Ёлдашова Марий Элышке шинчымашым налаш толын.
Кызыт тудо Марий кугыжаныш университетын йот йылме-влак факультетыштыже визымше ий тунемеш. Тудо ынде икмыняр ий вуз пелен англичан йылмым тунемме клубым вуйлата.
Йот йылмым туныкта
Л.Ёлдашова – МарГУ-н ик эн тале, вузын чапшым нӧлтышӧ, йот йылмыла дене моткоч куштылгын мутланыше студентке.
Англичанла туныктымо клубым вузышто эше 2017 ийыште почмо. Тудым чумыраш Мали гыч студент Мохамед Ламино Марико темлен улмаш. Тунем пытарымеке, шке пашажым умбакыже шуяш Лачын Ёлдашовалан ӱшанен коден. Тыге туркмен ӱдыр деке икмыняр ий кажне шуматкечын ятыр еҥ англичан йылмым тунемаш коштеш.
– Клубышто шкетын тыршем. Сандене кызыт полышкалышым кычалам. Тушко англичан йылмым палыше, но сайын кутырен моштыдымо тӱрлӧ ийготан еҥ-влакым погем. Тидлан оксам тӱлыман огыл. Тунемаш 6-7 еҥ дене коштыт, южо кечылаште 15 гыч 20 еҥ марте погына. Нунылан тӱрлӧ программым ямдылем. Ме ятыр темылан мутланена, йот йылме дене видеом але фильмым ончена, тыгак модына. Тыште икте-весе дене кутыраш, йолташым муаш йӧн уло. Тунемшем-влак сеҥымашышт дене чӱчкыдын куандарат.
Идалык мучашыште чолгалыкым ончыктышо-влаклан сертификатым кучыктена. Вашке тунем пытарем, сандене мыйым алмаштыше-влак лектыт манын, моткоч ӱшанем, – мане Л.Ёлдашова.
Волонтёр-влакым вуйлата
Тӱрлӧ национальностян студент-влак коклаште кылым пеҥгыдемдаш МарГУ пеленысе Интернациональный келшымаш клуб кугун полша. Тушко тӱрлӧ эл гыч чолга студент-влак коштыт, фестивальлашке ушнат. Лачын Ёлдашова тушто мероприятийлам эртараш полша.
Ӱдыр волонтёр пашаште кугу сеҥымашыш шуын. Ондак МарГУ-што тӱнямбал паша шотышто чолга волонтёрлан тыршен гын, кызыт волонтёр корпусын управляющийжылан шотлалтеш.
– Икымше курс гыч ты клубын мероприятийлашкыже кошташ тӱҥальым. Тӱрлӧ калыкын тӱвыраж дене палдарыме Night—fest фестивальыште икана Туркменистан кундемем дене палымым ыштенам. Ты клубын лаштыкшым «ВКонтакте» ден Инстаграмыште вӱден шогенам. Тӱрлӧ йылме дене киноклубым чумыренам, квиз-влакым эртаренам. Тыгак студент радамыш ушнышо-влаклан шуко мо дене полышкаленам.
МарГУ-што тӱнямбал паша дене волонтёр корпусым вуйлатымем илышыштем ик эн кугу сеҥымашлан шотлем. Кызыт мый документ-влакым кусарем. Шкенан пӧлкаште англичан але француз йылмыла дене гына кутырен моштышо студент-влаклан йылме шотышто полышкалем. Йот абитуриент-влак дене собеседованийым эртарем. Студент-влакын йодышыштлан онлайн вашештем, – мане тудо.
Таче Лачын англичанла, французла, туркменла, рушла сайын мутлана. Факультетыште йот йылмыла дене эртыше олимпиадылаште, конкурслаште шкенжым терга. Мутлан, 2022 ийыште француз йылме дене видеопроектым возымо конкурсышто 1-ше верым налын гын, 2021 ийыште англичан йылме дене – 3-шо верым.
Яра жапше годым Лачын чонжым кидпаша дене луштара. Тудо изиж годсек крючок дене сайын пидын мошта. Туркменистаныште илымыж годым йоча вургемым, тыгак модышым ятыр пидын. Эсогыл тидын дене тудо изирак бизнес пашам вораҥдарен колтен. Марий Элыштат йӧратыме сомылжым монден огыл. Могай гына модышым тудо огеш пид! Нунын коклаште маскам, рывыжым, шордым, мераҥым, мӱкшым да молымат ужаш лиеш.
Шкем шот дене кучыман
Л.Елдашева дене ме Туркменистан кундемын ойыртемже, туркмен-влакын илыш йӱлашт, пайремышт нерген кутырышна. Ты кундем тӱрлӧ национальный кочкышыжо, вургемже, мотор верлаже да эн чотшо шке ыштыме ковёржо-влак дене чаплана. Ик тыгай кугу пашажым Гиннессын рекорд-влак книгашкыжат пуртымо.
– Ме Ахалтекинский скакунын (имньын писын кудалме) кечыжым палемдена. Ты кечын имне дене кудалыштыт. Национальный кочкыш кокла гыч пловым, мантым, дограмам поснак ыштена. Национальный вургемлаште йошкар, шем, нарынче, ош тӱс-влак ик эн тӱҥлан шотлалтыт. Кидшолым да ӱдырамаш вургемын тӱржым тӱр дене сӧрастарат.
Ешыште пеҥгыде йӱла-влакым шуэн кучылтына. Ме «садака» поро пашам шуктена. Пошкудо, лишыл еҥ-влаклан кочкышым пуэдена. Юмылан тыге тауштена. Тыгай йӱлам, мутлан, йоча шочмо, дипломым налме але сайын илыме годым ыштат. Туркменистаныште шуко ойӧрым шотыш налына. Мутлан, кугыеҥ-влаклан изирак-шамыч нигунам «тый» манын ойлышаш огытыл; ача-авам эре пагалыман да нунын ӱмбак йӱкым ик ганат кугемдыман огыл; ӱдыр-влак пӧръеҥ-шамычын кидыштым кучен саламлалтшаш огытыл; икшывын ӱпшым икымше гана тудын чӱчӱжӧ гына пӱчшаш; йочан икымше пӱй лекмыж годым кугу пайремым эртарыман, – мане Л.Ёлдашова.
Дипломым налмеке, Лачын Марий Элыштат кодаш кумылжо уло. Но ончыкылык шотышто але рашемден огыл. Сандене ӱдырлан сеҥымашыш шуаш да эре ончыко каяш тыланена.