Марий Элым ТАСС увер агентстве турист-влаклан йӧнан акан кундем манын палемден. Унагудысо номер-влакын кокла акышт суткаште 5000 теҥгем огеш эрте. Тидын нерген соцкылыште увертарен Марий Элым Вуйлатыше Юрий Зайцев.
– Тений икымше кварталыште кундемышкына 280 тӱжем турист толын. 26 апрельыште тургымым официально почына. Уна-шамычым оҥай да поян программе вуча, – палемден Ю.Зайцев.
Ты тургымысо тӱҥ событий-влак:
– «Волжский вояж» туристический поезд икымше гана толеш. Маршрутшо: Моско – Чебоксар – Нижний Новгород – Москва. Кызыт марте 252 гыч 224 билетшым ужалыме.
– Козьмодемьянскыште икымше навигаций – тургымын икымше теплоходшым вашлиймаш.
– ПФО-со эксперт-влак дене пырля туриндустрийлан «Земля Мари-2025» бизнес-конференцийым эртарена.
2024 ийыште «Туризм и индустрия гостеприимства» нацпроект почеш 60 номерым, 4* категориян кок тӱшкагудым ыштыме, Йошкар-Олаште у туристско-информационный рӱдер почылтын.