Марий Элыште пытартыш ийлаште туризм койынак вияҥеш. Кызыт кундемна турист-шамычын ик эн йӧратыме регионышкыжо савырнен манын, пеҥгыдын каласаш лиеш. 2023 ий тӱҥалтыш гыч Марий Элыш чылаже 900 тӱжем утла турист толын каен. Тидыже кундемыштына туристический маршрут-влак оҥай да ӧрыктарыше улыт манме нерген ойла. Адакшым тӱрлӧ архитектуран объект, турист-влаклан лӱмын ямдылыме сату да молат нуным сымыстарат.
Йӧнан да сай
Шукынжо Йошкар-Оласе Брюгге набережныйым, Патриарший площадьым, музей ден памятникым, динамический скульптур-влакым ужаш кумылан улыт. Тыгак, Юрино посёлкышто верланыше Шереметев замок, Козьмодемьянск оласе кава йымалысе тоштер, Морко районысо Унчо селасе этнокультурный комплекс кундемнан ик эн мотор верыштлан шотлалтыт. Самырык-шамычлан Йошкар-Ола утларак келша. Марий Элын рӱдолажым путешествоватлаш йӧратыше-влак элыштына ик эн йӧнан вер семын палемдат. Тыгак Йошкар-Ола селфи-туризм дене элнан лу эн сай ола радамышкыже пура.
Тачысе кечылан кундемыштына туризмым вияҥдымаште туроператор-влакын 10 фирмышт, туристско-информационный 4 рӱдер, туризмым вияҥдыме рӱдер, экскурсионно-паломнический службо кугу пашам шуктат. Турист-влаклан 294 турмаршрутым да эксурсионный программе-влакым келыштарыме. Нунылан мемнан дене жапым эртараш пайдале да йӧнан лийже манын, 55 унагудо да туристический комплекс-влак, тазалыкым пеҥгыдемдыме 6 объект да каныме 19 базе улыт.
