МарГУ-што ик оҥай проект пашам тений апрельыште тӱҥалме. Кызыт тудо умбакыже шуйна.
Тидлан МарГУ-со проектный команде ныл тӱрлӧ инициативым темлен да «Жемчужина Поволжья» проект Российысе вузласе молодёжный проект-влак конкурсышто сеҥыше радамыш логалын. Кызыт тудым шуктымаште студент-влак тыршат. Нуно этнокультурный маршрут ден турпродукт-влакым ямдылат, тыгодым марий калыкын йӱлажым, историйжым келгынрак тунемыт.
Эн ончычак студент-шамычым марий калыкын тӱвыраж нерген семинарлаште каласкалат. Марий Эл Республикым национальный гастрономий полшымо дене палдарыме тур-влакым ямдылыме шотышто интенсив-влак эртаралтыт. Варажым ӱдыр-рвезе-шамычым гастрономический да туризмын моло видыштыжат ямдылыме турпродукт-влакым кумдан шаркалаш маркетплейс-влакым ышташ туныктат. Тыгак участник-влак марий калык кочкышым ямдылыме мастер-класслаште шинчымашым погат.
Тылеч вара молодёжный практике да ямдылыме турпродукт ден маршрут-влакым ойырен налме шотышто конкурс лиеш.