Лавр лышташыште ятыр фитонцид, пайдале микроэлемент да дубильный вещества уло. Нуно микробым пытарат да организм гыч шлакым луктыт. Коштымо лышташыштат ятыр пайдале вещества аралалт кодеш.
Лавр лышташ настойко остеохондроз да тупрӱдысӧ пӧшыр (грыже) годым корштымым пытара. Кокла кугытан 17 лавр лышташым банкыш пыштыман да пеллитр ош аракам темыман. Петыртыш дене петырен, пычкемыш верыште кум сутка кучыман. Жапын-жапын рӱзалтыман. Настойкым компресс семын кучылтман. Кечывалым да йӱдлан компрессым тупысо корштымо верыш пыштыман да шокшо шарф дене пӱтыралман. Тыге тылзе ышташ лиеш.
Лавр лышташ дене настой иммунитетым нӧлталеш. Ик стаканат пеле шокшо вӱдыш ик изи совла тыгыдемдыме лавр лышташым пыштыман, термосышто ныл шагат кучыман. Вара шӱрыман да изин-изин подылын йӱман, 12 шагатыште йӱын пытарыман. Тыге ныл кече эмлалтман.
Лавр лышташ ньогалан сайын малаш полша. Тидлан йочан вакшышышкыже икмыняр лышташым пыштыман.