Шӱргыял школышкына индеш идалык ончыч поро койыш-шоктышан, шыма шинчаончалтышан вич ньога шинчымаш тӱнян волгыдо «капкашкыже» вончаш толын. Ты жап шижде эртен кайыш. 22 майыште школыштына нунылан Пытартыш йыҥгыр йоҥгыш.
Выпускник-влак школ йолгорныштым шарналтышт. Воспитательышт А.В.Сергеева ден икымше туныктышышт Л.Н..Кирилловам мокталтен колтышт. Нунын дечат шокшо шомаклам, сай тыланымашым нальыч. Пайрем кечын школ вуйлатыше В.И.Кириллов шуко сай да чоныш логалше тыланымашым каласыш, мокталтен колтымыж дене изи чоныштым вӱчкыш. Школ вуйлатышын алмаштышыже Т.Г.Гаврилова дечат ятыр сай мут да тыланымаш йоҥгалте.
Пытартыш йыҥгырнан поро унаже Лариса Ивановна Дмитриева лийын, тудо Морко районысо Пенсий фондышто клиент службым вуйлатышын сомылжым шукта. Пеш чын да сай тыланымаш шомакла дене выпускникна-влакын чоныштым вӱчкыш. Тыгак ты кечын выпускникна-влакын йӧратыме ача-авашт дечат пеш шуко чоныш логалше шомак йоҥген. Нуно чыла туныктышылан тау мутым ойленыт.
Ынде выпускникна-влак уло вий-куат дене экзаменлан ямдылалтыт, чыла предмет дене экзаменым сайын кучен, кидыш сай отметкан аттестатым налын, кажныже тиде сото илышыште шке чын корныжым муаш шона. Пиалан ончыкылыкыш тендам, йӧратыме да эн шергакан выпускникна-влак!
Е.Григорьева, Шӱргыял школын марий йылме туныктышыжо.
Снимкыште: Пытартыш йыҥгыр годым.