Республикысе образований да науко министр Наталья Адамован ойлымыж почеш, «Земский учитель» программе почеш сеҥыше-влаклан 1 млн. теҥге оксам пуат.
Тиде программе 2020 гыч 2022 ий марте пашам ышташ тӱҥалеш. Тудын тӱҥ цельже – ялласе школлашке каяш кумылаҥдаш.
2020 ий 10 январь годсек Россий просвещений министерствын «Земский учитель» Zemteacher.edu.ru информационный порталже пашам ышта. Тиде портал дене пайдаланен, туныктышо-влак программыш ушнаш йодмашым пуэн кертыт.
Кӧ ушнен кертеш?
Конкурсышто кыдалаш профессиональный але кӱшыл шинчымашым налше, профстандартын йодмашыжлан келшыше, 55 ийыш шудымо туныктышо участвоватлен кертеш. Пашаш пурымеке, тудо арняште 18 шагат занятийым эртарышаш да трудовой договор почеш 5 ий пашам ыштышаш.
«Земский учитель» программыш йодмашым пуышо-влакым посна комиссий терга. Тудо икмыняр критерийым шотыш налеш: квалификаций категорий, учёный степень, профессиональный образований, ешартыш профессиональный образований, туныктымо стаж, отличий знак. Школын ола деч тораште улмыжат шотыш налалтеш. Пашам ышташ кайыме села ден яллаште 50 тӱжем еҥ деч шагалрак илышаш.
Тыгай документ-влак кӱлыт:
– конкурсыш ушнаш кок йодмаш (образец сайтыште уло), паспорт копий, кӱшыл але кыдалаш профессиональный шинчымаш нерген копий, ешартыш образований нерген копий, туныктышо олмеш йодмашым вес еҥ ышта гын, документын (паспорт да доверенность) копийже.
Программыш ушнаш манын, 10 январь гыч 15 апрель марте йодмашым колташ лиеш. Тылзе жапыште 139 йодмаш пурен.
Кызыт порталыште Марий Элыште 45 паша верым темлат. Мутлан, Тошто Торъял школыш химий да биологийым, Шернур посёлкысо 2-шо №-ан школыш информатике да математикым туныктышо-влак кӱлыт.