Туныктышо-влак погыненыт

Марий Элысе образований да науко министерствын сайтше гыч налме фото.

17 февральыште Марий Элысе Образований да науко министерстве Марий образований институт дене пырля Козьмодемьянскысе «Дарований» школ-интернатыште регион-влак кокласе педконференцийым эртарен.

Тушто йоча-влакым воспитатлыме формо ден йӧн-влакым тӱҥалтыш школышто кучылтмо, класс вуйлатыше-влакын пашаштышт актуальный аспект-влакым палемдыме, икшыве-влаклан ешартыш шинчымашым пуымо да моло йодышым нӧлталме.

Конференцийыште Угарман, Моско кундемла, тыгак Йошкар-Ола ден Козьмодемьянск олала гыч учёный ден практик-влак докладым ыштеныт. «Дарований» школ-интернатын туныктышыжо-шамыч 11 мастер-классым ончыктеныт, почмо урок-влак лийыныт.