Марий Элысе калыклан паша верым ситарыме шотышто службын данныйже почеш, республикысе школлаште 352 педагог ок сите.
Математикым туныкташ 46 вер уло, руш йылме ден литературым – 42, йот йылмым – 28, физкультурым – 22 да моло предмет денат. Утларакшым педагог-влак Йошкар-Олаште огыт сите (126), кокымшо верыште – Звенигово район (55), кумшышто – Медведево (52). Лач Параньга ден Юрино районлаште вакантный вер уке.
Педагог-влакын школыш кайымышт ок шу – пашадар изи. Тидым шотыш налын, 5 июльышто Марий Элым Вуйлатыше пунчалым луктын. Тушто педагог-влакын пашадарыштым 5 процентлан кугемдаш манме. Тыгак самырык туныктышо-шамычлан надбавкым ыштышаш улыт.