Шӱргыял школышкына индеш идалык ончыч вич ньога шинчымаш тӱнян волгыдо «капкашкыже» вончаш толын. Жап шижде эртен кайыш. Ик йоча, Роман Матвеев, Йошкар-Олашке тунемаш куснен, садлан ныл тунемше 9 классым пытара. 20 майыште нунылан Пытартыш йыҥгыр йоҥгыш.
9-ше классым пытарыше-влак пӱтынь школ йолгорныштым шарналтышт. Икымше туныктышышт И.Г.Кирилловам мокталтышт. Ирина Геннадьевна дечат шокшо шомаклам, сай тыланымашым нальыч. Школ вуйлатыше В.И.Кириллов чоныш логалше тыланымашым каласыш, кажне выпускниклан чап кагазым кучыктыш. Школ вуйлатышын алмаштышыже Т.Г.Гаврилова дечат тыланымаш йоҥгалте. Ончычсо школ директор А.Е.Алексеев выпускник-влаклан ятыр поро мутым каласыш, шарнымаш пӧлекше дене чоныштым куандарыш.
Пайремыш Юрий Алексеевич Поликарпов толын ыле, тудо Морко районышто корно экшык деч эскерыше начальникын сомылжым шукта. Пеш чын да сай тыланымаш шомакла дене выпускникна-влакын чоныштым вӱчкыш. Тыгак ты кечын выпускникна-влакын йӧратыме ача-авашт дечат пеш шуко чоныш логалше шомак йоҥген. Нуно чыла туныктышылан тау мутым ойленыт.
А ынде выпускникна-влак уло вий-куат дене экзаменлан ямдылалтыт. Пиалан ончыкылыкыш, йӧратыме да шергакан выпускникна-влак!
Е.Григорьева, Шӱргыял школын марий йылме туныктышыжо да выпускник-влакын класс вуйлатышышт.
Снимкыште: пытартыш йыҥгыр годым.
