Марий Элым Вуйлатыше Юрий Зайцев вияш эфирыште увертарен: Марий Элыште 150 педагоглан вакансий уло. Тений педагог-влакын пашадарыштын базовый ставкыштым 15 процентлан шукемдыме. Тыгак республикысе ола ден посёлкылаш пашам ышташ толшо самырык педагог-влаклан 100 тӱжем теҥге выплатым ик гана тӱлат, селаш, ялыш кайыше-влаклан – 300 тӱжем теҥгем.
Эмлызе-влак шотыштат икмыняр вашталтыш лиеш. Ял шотан илемыште пашам ыштыше врач-влакын пашадарыштым 15 процентлан кугемденыт. Илыме-коммунальный услугым тӱлымӧ роскотым кугыжаныш компенсироватла. Илыме условийым саемдаш медпашаеҥ-влаклан 3 миллион теҥге субсидийым ик гана пуат.