Туныктымо паша – тиде илыш

Медведево районысо Шойбулак села  Йошкар-Ола деч лу меҥге тораште верланен. Сылне вершӧрысӧ кок пачашан школышто 419 йоча тунемеш. Икшыве-влакым 19 ял гыч (Шаплак, Пӱнчерсола, Какшансола, Поланур да моло) кум автобус шупшыкта.

Школышто кугыжаныш марий  йылмым 5-ше  гыч 11-ше класс марте Л.А.Лебедева туныкта.

                                       Тыршымаш кумыл 

   Йоча-влаклан  шинчымашым 31 ий  пуэн шогышо чолга педагогын шочмо йылмын поянлыкше  нерген лывыргын кутырымыжо да тургыжланымыже пуйто чонжо гыч шытен лектеш. Лариса Алексеевна поэзийлан, мурылан моткоч шӱман. Почеламутым воза, серымыжлан семым келыштара.   Муралтымыже шӱмыш шыҥа. Усталыкшым ужын, чоным куан авалта. Тунемше-шамычымат сылнымутлан шӱмаҥда. Изи увер, заметке-влакым возаш кумылаҥда.

Туныктышын  мастарлыкше йогын вӱд семын, шыман лойгалтын шуйнышо тасма гае шинча ончылно сӱретлалтеш. Шочмо йӱлаже, Медведево кундемысе Аксарка ялже нерген  шкенжын поэзий аланыштыже почеш. Сылнымутын поянлыкшым тунемше-шамычланат намиен шукташ тырша.

– Чаманен каласаш логалеш, тиде предметлан жап эре шагалемеш, –каласкала Лариса Алексеевна. – Ончыч арняште 18 шагат лийын гын, вес ийлан 16 веле кодеш. Йоча-влакым шочмо йылмылан  ме, туныктышо-влак, кумылаҥдена, тидлан шуко йӧным кычалына, мероприятий-влакым эртарена. «Самырык тукым»  конкурсышто лауреат лӱмым налынна. Моло мероприятийышкат ушнаш тыршена. Икшывым шочмо йылмылан шӱмаҥдаш ешыштат мондыман огыл.

 

                            Чолган ушнышт

  Школышто лиймына годым Лариса Алексеевна  тунемше-влаклан мемнан нерген каласкалыш да марла лекше могай изданийым паледа манын, нунын деч йодо. Йоча-влаклан «Кече» журнал лишыл йолташ лийын гын, ынде шочмо йылме дене лекше эше кок марла изданий нерген утларак пален нальыч.

5-ше классыште шинчымашым погышо-влаклан  Христина Александрова «Ямде лий» газет, юнкор  шотышто каласкалыш, мый «Кугарняште» савыкталтше лаштыкла дене палдарышым. Журналистын пашаж нерген ойлымынам  йоча-шамыч кумылын колыштыч.

Изи мӱкш гай погынышо руш да моло еш гыч улшо  самырык тукым  марла эн сылнын почеламутым лудмо конкурсыш, кидым нӧлтен, вожылде, чулымын ушныш. Чолгалык дене  Софья Хоробрых, Егор Иванов, Михаил  Дмитриев, Анастасия Беляева, Лейла Исмаилова  да молат ойыртемалтыч. Артист гае койышыж дене  Е.Иванов  чотак ӧрыктарыш да 1-ше верым нале. Егорын ачаж ден аваже марий улыт.  Купсолаште илат. Икшыве тунеммаштат чолга. Шахмат дене сайын модеш. Йодыш-влакым пуымо годым Л.Исмаилован чолга койышыжат пеш келшыш. Лейлан ешыже Дагестан  гыч илаш куснен.

Южо тунемше  марла кӱчымынрак лудо  гынат, шочмо йылмым пагалыме шӱлыш Шойбулак школышто садак шижалте.

                                  Ӱшан ок йом

  «Марий йылмын ончыкылык пӱрымашыжым Те кузе ужыда?» – йодышемлан Лариса Алексеевна тыгерак вашештыш:

– Марий йылме садак аралалт кодеш, шонем. Илен-толын, тудын кӱлешлыкшым чылан аклаш тунем шуына да утларак  йӧраташ тӱҥалына манын, ӱшаным ынем йомдаре.

Умбакыже материалым «Кугарня» газет 7-ше майысе номерыштыже лудса.

 

Зоя Тимофеева.

Х.Александрован да Л.Лебедеван альбомжо гыч налме фото-влак.