Настя – поро да эре шыргыжше, весела, еҥ-влак дене кылым вашке муын моштышо марий ӱдыр. А эше ответственный да йоча-шамычым йӧратыше. Тыгай улмыжо ончыкылык профессийыштыже путырак кӱлешан. Тудо марий да англичан йылмылам туныктышо лияш ямдылалтеш – МарГУ-со Калыкле тӱвыра да тӱвыра кокласе коммуникаций институтышто икымше курсышто тунемеш.
Морко район Унчо селан шочшыжо Анастасия Сидорова изинек чолгалыкше дене ойыртемалтын. Настян аважат Татьяна Алексеевна ты школыштак пашам ышта, директорын воспитатлыме паша шотышто алмаштышыже да туныктышо-логопед. Ешыште кум ӱдыр улыт, Настя – кугуракше.
– Школ пагыт – эн весела жап. Пырля тунемме йолташем-влак дене ятыр мероприятийыш,конкурсыш ушненна. Шочмо йылме дене федеральный олимпиаде (2-шо вер), «Кугезе вож» фольклор фестиваль (1-ше вер), «Защитим лес» республикысе конкурс (1-ше вер) да моло конкурсышто ончыл радамыш лектынам. ИКН, право, физкультур предметла дене районысо олимпиадыште призовой верла дене палемдалтынам. Сылнымутлан шӱман улам, почеламутым але прозым сылнын лудмо конкурслаште эре гаяк сеҥыше-влак радамыш лектынам, – манеш Настя.
Изирак класслаште тунеммыж годым ӱдыр актрисе лийнеже улмаш, варарак – пӱйым эмлыше врач, эше вес профессийыштат тыршаш кумылжо лийын. А тунемаш пурен марий да англичан йылмылам туныктышылан.
Йошкар-Олаш тунемаш толмыжо, студент жапше нерген ӱдыр теве мом ойла:
– Тӱҥалтыште кеч-куштат куштылго огыл: у вер, у дисциплине-шамыч, преподаватель-влакым икымше гана ужат, ӱдыр-рвезе-влак дене палыме лият… Икымше тылзе путырак нелын чучын. А вара эркын-эркын чылажат шке верышкыже шинчын, университетыште эртаралтше мероприятийлаш ушнаш кумыл лектын. Кызыт волонтёр пашам шуктем, тиде сомыл нерген статьялам возем. Иктаж-могай мероприятий годым почеламутым сылнын лудаш ӱжыт.
Икымше сессий деч чот лӱдынам, вет чылажат — палыдыме. Но тыршен ямдылалтынам, садлан чыла экзаменым «визытанлан» сдатленам.
1-13 апрельыште Н.Сидорован икымше практикыже Йошкар-Оласе 28-ше №-ан лицейыште эрта. Ӱдырын палдарымыж почеш, йоча-влак дене пашам ышташ тудлан келша. Ты лицейыште ӱдыр-рвезе-шамыч поро, ум пален налаш шонышо, тыршыше, кугуракым пагалыше да изирак-шамычлан полшышо улыт.
Настян чонжылан келшыше сомыл гыч иктыже – видеом войзаш, монтироватлаш, фотографийым ышташ. Тидын дене кылдалтше курс-влакым онча, шкаланже ум да пайдалым налаш тырша. Ӱдырлан сай йолташ – книга.
Лишыл жаплан палемдыме ик эн тӱҥ цель – университетым тунем пытараш да сай специалист лияш. А тиде шукталтешак, вет Настя пашам йӧратыше, эн тӱҥжӧ – нелылык деч лӱдын ок шого.
А.Сидорован альбомжо гыч налме фото.