СОВЕТСКИЙ посёлкышто илыше-влак тумо отышко вӱдым шаваш лектыныт. Кодшо ий мучаште посёлкын Шоссе лӱман урем гыч Калинина урем воктене верланыше автовокзал марте изи тумо-влакым шындыме. Шокшо игечылан кӧра ото кошкаш тӱҥалын. «Изи тумым ончыкылык тукымлан арален кодена!» — «Вестник района» газетын пашаеҥже-влак тыгай ӱжмаш дене вӱдым шаваш лектыныт. Посёлкысо 50 ура чонан еҥ полшаш ушнен. Шавшлан вӱдым пожар деч утарыше службо деч налын, поро пашам шуктеныт.