30 июль гыч 4 август марте Марий Элыште чодыра пожар шотышто IV класс лӱдыкшӧ аралалтеш. Тидын годым лесничестве кумдыкыш транспорт дене пураш, тулотым ышташ, пиротехникым кучылташ чаралтеш. Тидым шуктыдымо еҥ-влаклан штрафым тӱлыктат, тыгай экологийланат кугу эҥгек лийын кертеш.
Ты йодышым кодшо кечылаште Марий Эл Правительствысе заседанийыште каҥашыме.
Кодшо арня марте республикыштына 18 чодыра пожар лийын. Тиде ӱмашсе дене таҥастарымаште шагалрак, вет тунам 31 случайым регистрироватлыме.
– Тиде тӱшка пашан лектышыже. Республикысе чодыралаште авиаций дене мониторингым ыштат, патруль коштеш, пожарный вышкылаште сутка мучко дежуритлат, «Лесохранитель» аппаратно-программный комплекс дене видеонаблюдений йӧн дене эскерат. Тыгак «Экологий» нацпроект почеш налме технике тудым писын йӧрташ полша. Пытартыш кум ийыште 63 лесопожарный техникым да 539 противопожарный оборудованийым налме, чумыржо 203 млн теҥгеашым, – ойлен Юрий Зайцев.
Чодыра пожар шуко лиймын эн кугу амалжылан тулым шекланыде кучылтмаш шотлалтеш. Южгунам кӱдырчылан кӧра лийын.
Пӱртӱс ресурс, экологий да йырым-йырысе средам аралыме министр А.Кисилевын палемдымыж почеш, чыла 18 пожарымат икымше суткаштак да 100 процентлан йӧртен кертме. Ты сомылыш 55 техникым да 169 еҥым ушымо.