Пожар лӱдыкшӧ лийын кертме тургым тӱҥалмеке, Марий Элыште 23 чодыра пожарым регистрироватлыме. Тул 18 га кумдыкым авалтен. 17 случайыште тул еҥ-влакын тулым шотдымын кучылтмылан кӧра ылыжын, кӱдырчылан кӧра – 6 пожар.
Республикысе чодыралаште пожар лийын кертме посна режимым увертарыме. Тиде жапыште чодыралаште да воктенысе кумдыклаште тулым ылыжташ чарыме. Посна ямде улмо режим годым пожар лӱдыкшыдымылык правилым пудыртымылан 40-50 тӱжем теҥге штрафым тӱлыктат, палдара республикысе Пӱртӱс поянлык, экологий да йырым-йырысе средам аралыме министерстве.