Тукымвожын профессийже

КУтузовмыт. Вероника Ивановна Веселова - шола гыч кокымшо.

Апрель мучаште Я.Эшпай лӱмеш Марий кугыжаныш филармонийыште «Марий Элысе паша династий-влак» конкурсышто сеҥыше ден призёр-влакым саламленыт. Тыгай таҥӱчашым эртараш кодшо ийын республикысе отраслевой профсоюз организаций-влак темленыт. Марий Элысе профобъединенийым вуйлатыше А.Майоровын мутшо почеш, ынде тудо еш династий-влакым иктыш кажне ийын чумырышаш.

12 участник

Ты мероприятийыш Марий Турек, Шернур, Параньга, Медведево, Советский районла да Йошкар-Ола гыч 12 династий толын.

Нуно, сценыш лектын, еш историйыштым радамленыт да тукым гыч тукымыш шӧртньӧ але шнуй арвер семын куснылшо профессийыштлан ӱшанле улмышт нерген ойленыт. Участник-влакын пашашт корным чоҥымаш ден автомобильный озанлык, чодыра паша, калык образований ден шанчывече, радиоэлектронный промышленность да почто дене кылдалтыныт. Кажне еш династийын паша стажше 60 гыч 930 ий марте погына да ятыр тукымыштым авалта!

212 ий стажан

Кутузовмыт тукымышто ныл тукымын педстажше 212 ийыш погына. Ты династий дене Кугу Пумарий школышто 20 утла ий пашам ыштыше Вероника Ивановна Веселова палымым ыштыш. Тудын Татьяна шӱжаржат тыштак тырша.

Туныктышо корным эн ончыч чӱчӱшт, Николай Семёнович, ойырен налын. Тудо 1938 ийыште Шернур педучилищым тунем лектын. Кугу Отечественный сар гыч пӧртылмеке, Элпанур школыш географийым туныкташ колтеныт. Вара Лажмарий йочапӧртын, Элпанурысо шымияш школын директоржылан тыршен, тыгак Косолоп районысо «Путь  Сталина» райгазетын секретарьже лийын, Кугу Пумарий школышто 1960-1973 ийлаште пашам ыштен.

Пелашыже Мария Никитьевна Элпанур, Памашъял, Вочарма, Олор да Кугу Пумарий школлаште тӱналтыш класслам туныктен.

Вич шочшым ончен куштеныт. Саша эргышт Советский район Кадам, Килемар район Кого Шудыгуж да Параньга район Кугу Пумарий школлаште англичан йылмым туныктен. Пелашыже Любовь Ивановнан педстажше – 37 ий.

Николай ден Геннадий йыгыр эрге-влакын ӱмырышт кужу лийын огыл, но шашке дене спорт мастерыш шуыныт. Николай Семёновичын Галина ден Людмила ӱдыржӧ-влакат образований сферыште тыршат.

Кажныже шке пашам пӱрымашлан шотла. Тукымвожым пален, тудын йӱлажым шуктышо еш ий еда шукемже.

Тичмаш материал -«КУГАРНЯ» газетыште (2022 ий 15 май).