Эртыше кечылаште Юрий Зайцев Республикысе профсоюз-влакын «Люди труда» фестиваль-конкурсшын лауреатше-влакым саламлен.
Тидын лӱмеш пайремле мероприятий Йошкар-Оласе рӱдӧ тӱвыра да каныме паркыште эртаралтын.
Марий Элым Вуйлатышын палемдымыж почеш, паша династий, наставник да самырык специалист-влакым саламлымаш Икымше Май пайремын йӱлашкыже савырнен да вет тидыже айдемын пашажым пеҥгыдемда, чапландара, профессийжын кӱлешлыкшым ешара.
2025 ийыште «За преемственность поколений» номинацийыш ушнышо-влаклан Тауштымашан серышым кучыктымо. Тӱрлӧ профессийыште эн сай паша династий-влаклан шотлымо:
– Республикысе усталык рӱдер гыч артист, хореограф да музыкант-влакын Дмитриевмыт ешыштым. Ты тукымышто ныл еҥ гына, а паша стажышт 102 ийыш погына.
– Морко район Шеҥше социально-культурный комплекс гыч Николаевмыт-Хамидуллинмытым. Ты тукымысо 6 еҥын паша стажышт – 134 ий.
– Йошкар-Оласе 1-ше №-ан ТЭЦ-ын пашаеҥже-влак Никулинмытым. Династийысе 7 еҥын стажше 113 ийыш погынен.
– Марий машиностроительный заводышто тыршыше Писаревмыт-Зиятдиновмыт-Лежнинмыт. Тукымысо 12 еҥын паша стажше 270 ий утла.
– Соловьевмыт-Чернышовмытын педагог тукымыштышт – 10 еҥ, паша стажышт – 248 ий.
– Юрино лесхозын пашаеҥже-влак Старцевмыт-Ивановмытын тукымысо 9 еҥын паша стажышт 307 ийыш шуын.
Марий Элым Вуйлатыше ешарен: профессий-влакын тукым гыч тукымыш куснымо йӱлашт ончыкыжымат лийыт, вет тиде мемнан элнан, Родинын йӱлашт.