Кызытсе саманыште самырык ӱдыр-рвезе-влак шкеныштым тӱрлӧ шӧрыныштӧ шуарат, ойыртемалтше пашам шуктат, эреак ум кычалыт. Нунын нимо деч лÿддымышт да тунемаш кумылан улмышт куандара.
Теве Йошкар-Олаште илыше Оля Озейкина троллейбуслан моткоч шӱман. Вузышто тунеммыж годымат занятийыш лач ты транспорт дене кудалыштын. Ӱдыр ПГТУ-со социальный технологий факультетыште «реклама и связи с общественностью» специальностьым налын. Ты профессий кызытсе саманыште ик эн йодмашанлан шотлалтеш. Туге гынат Оля шканже вес корным ойырен – троллейбусым виктараш тӱҥалын. Кеч тылеч ончыч тудын технике да корно дене пашам ыштыме нимогай опытшат лийын огыл. Кудалышташ тудо троллейбус денак тунемын, садлан кызыт корнышто уто нелылыкым огеш шиж. Ты пашалан кумылаҥмыж нерген тыгерак каласкалыш:
– Мый шуко жапым шкетын эртаренам. Шуко йолташем лийын огыл. Илышышкем иктаж-могай у сыным пурташ шонен, очыни, троллейбус водитель лийынам.
Ойырен налме профессием чонемлан келшен огыл, но кажне кечын тунемаш коштынам. А кастене ушыштем шканем келшыше илышым «сӱретленам». Икманаш, кузе тудым чоҥаш да кушто шкемым муаш, кычалынам. Вузыш мый троллейбус дене кудалыштынам. Ты транспортышто лиймем годым ала-могай ласкалыкым шижынам. Санденак, очыни, занятий-влакым ик ганат коден омыл.
Троллейбус дене илышем кылдыме шотышто шонымашым идалык ончыч ушыштем пеҥгыдемденам. Тыге технике деке шижмаш шочын. Ик кечын мӧҥгӧ кудалмем годым троллейбусым самырык ӱдыр-стажёр виктарен. Мый тудым тӱткын онченам, туныктышыжымат колыштынам. Ты случай деч вара водитель лияш эшеат чот кумылаҥынам. Кок тылзе гыч кӱлеш документым поген тунемаш каенам.
2022 ий 1 сентябрьыште Оля икымше гана троллейбус паркыш пурен. Ӱдыр шке верыште улмыжым вигак шижын. Чоныштыжо куан кумыл веле озаланен. Каласыман, тудо тылеч ончыч технике дене ик ганат пашам ыштен огыл. Икымше кечынак чонлан лишыл йолташ-влакым муын. Тудын ойлымыж почеш, «сӱретлыме» илышыже чоҥалтын.
О.Озейкина дене тыгак троллейбусым виктарыме шотышто мутланышна. Ты транспортын сай да уда могыржо-влакым лончылышна. Мутлан, тудын ойлымыж почеш, пашадар моткоч изи. Игече чот шокшо але йӱштӧ гынат, кудалыштман. Тале йӱр йӱреш але поран ӱштеш – чытыман.
– Пашам кок смене дене ыштена. Икымше сменыш лекташ кум шагат эрдене кынелам. Ныл шагатат 25 минутлан дежурствыш лектына, куд шагатлан пассажир-влак деке тарванена. Паша кече 12 шагат шуйна.
Олаш лекме деч ончыч путевой документацийым оформитлыман, организмыште спиртан вещества уло але укем тергыман, салонышто арулыкым ыштыман. Кондуктор йолагайрак гын, водительлан мушкаш логалеш. Мый еҥ-влак деке пуракан транспорт дене лекташ аптыранем. Содыки ме калыкым шупшыктена, адакшым мый ӱдыръеҥ улам. Садлан сиденьыште, кидкучемыште пуракым ӱштам, кӱварымат мушкам.
Тыгак троллейбусын технический состоянийжым тергыман: оравам, омса почылтмым да петыралтмым, остановкым кугу йÿк дене ойлымо аппарат пашам ышта але укем ончыман. Иктаж-могай экшык вашлиялтеш гын, ремонтым ыштыме канавыш пурыман. Вара веле пассажир-влак деке лекташ лиеш, – мане тудо.
Оля тыгак корнышто вашлиялтше тӱрлӧ случай-влак нерген каласкалыш. Водитель-влак коклаште утларакшым пагалымаш озалана, мане. Но улыт тыгай еҥ-влакат, кудышт лӱмынак ӱчым ыштат. Мутлан, корно полосаш шӱшкылт пурат, остановко гыч тарванен лекташ огыт пу.
– Пашадар изи, корнышто тӱрлым ужаш логалеш гынат, троллейбусым виктараш мыланем моткоч келша. Мо дене ты транспорт чонем сымыстарен, ойленат ом керт. Пассажир-влакын тауштымышт эшеат шулдыраҥда. Поро чонан еҥ-влак олаштына шукынак улыт. Тыгак еҥ-влакын шинчаончалтышыштым кучаш моткоч куанле. Садлан шке верыште улмемым да йӧратыме пашам шуктымемым эше ик гана пеҥгыдемден кертам.
Шукыж годым ӱдыр-влакын тӱшка транспортым виктарымыштым ужмо годым ме, пассажир-влак, изиш аптыранена, шинчынат каяш лӱдына. Арам улмаш, нуно шке пашаштым моткоч ответственно шуктат. Садлан ӱдыр водительым ужыда гын, шыргыжалаш ида мондо. Тыге шкендан да тудын кумылжым нӧлтеда!
О.Озейкинан альбомжо гыч налме фото.