20-21 февральыште тӱнямбалне пайремлалтше экскурсовод-влакын кечышт палемдалтеш. Тидын вашеш «Создавая настроение» черетан фестиваль эртаралтеш.
Тений тудо нылымше гана лиеш. 20 февральыште тӱрлӧ тоштерыште экскурсийым эртарат гын, 21 февральыште троллейбусышто кудалшыла, «Йошкар-Ола из окна троллейбуса» экскурсийым колышташ лиеш. Мутлан, 11 шагат кечывалым Сеҥымашын ХХХ идалыкше лӱмеш тӱвыра полат остановко деч Ленин лӱмеш тӱвыра полат марте кая. Тудо маршрут деч посна кая, но посна сӧрастарыме да палемдыме лиеш. Вара 2-шо номеран троллейбус 13 шагатат 8 минутлан Вишнёвая остановко деч Ленин лӱмеш тӱвыра полат марте кудалеш. 11-шо номеран троллейбус 13 шагатат 10 минутлан Вокзал остановко гыч ик йырым ыштен Вокзал остановко марте кудалеш. Билетын акше – 19 теҥге. Но 88002221105 телефон номер дене ончылгоч йыҥгыртен возалташ кӱлеш.