Марий Эл Правительстве тренер-влак шотышто у пунчалым луктын.
– Тиде «Земский тренер» федральный программын ик ужашыже. Тудо 50 тӱжем еҥ марте илыман вершӧрыш пашаш кайыше физкультур да спорт сферысе специалист-влаклан выплатым пуымо нерген. Спорт дене шукынрак заниматлаш тӱҥалмаш еҥ-влакын тазалыкыштым саемдаш да таза илыш-йӱлам шыҥдараш полша. А тидыже социальный вияҥмаш сферыште кугыжаныш политикын ончыкылык задачыжлан шотлалтеш, – каласен регионым вуйлатыше.
Ты пунчал почеш 2026-2028 ийлаште Марий Элыште тренер-шамычлан 1 млн теҥге дене ик гана пуымо выплате тӱлалтеш. Тидлан тудын кӱшыл да кыдалаш профессиональный образованийже лийшаш да, договорым тичмаш кечылан подписатлымеке, вич ий тушто пашам ыштышаш.
«Земский тренер» программе республикысе районлаште квалифицироватлыме специалист-влакым ешараш да тӱшка спортым шукемдаш полшышаш. Тыгак посна еҥ-влакат физкультур дене системно заниматлен кертыт.
Тиде инициативе Россий Президент Владимир Путинын 2030 ий марте да ончыкылыклан 2036 ий марте палемдыме «Сохранение наследия, укрепление здоровья и повышение благополучия людей, поддержка семьи» национальный шонымашыж почеш кӱлешан ошкыллан шотлалтеш.
Фотом Марий Эл Республикысе Спортлан ямдылыме рӱдерын сайтше гыч налме.