Институт деч вара пелашемым Советский районысо ик мотор ялыш пашам ышташ колтышт. У верыште пöртым чоҥышна да илаш тӱҥална, а мый мöҥгыштö йоча дене шинченам.
Икана омым ужам, пуйто ала-кöмыт веранде окнаш пеш тӱкалат. Лектым да колам: «Роза, омсам поч, пешак шуженна, кочмына шуэш». А мый нуным ом пале. А кушеч нуно мыйым палат, öрынат кайышым.
Иктыже шоҥгырак, а весыже самырык. Почын пуртышым, а нуно, ну, писын кочкыт вет, совлашт дене лупшат веле, пеш вашкат. Вара помыжалт кайышым.
Эрдене омемым пелашемлан каласкалышым. А тудо трук кычкырал колтыш: «Изамын колымо кечыже вет, ушташ кӱлеш, нуно толыныт улмаш». Вара мелнам кӱэштым, ӱстелым погышым да кузе моштенна, туге уштышна.
Петро кечат толын шуо, Шернур могырышто тиде кечын шӱгарлашке коштыт. Мый икымше гана тушко пелашемын ачажым, изажым, моло родо-тукымжым ушташ пырля миенам. Сайынрак ончальым гын, фотошто ачаж ден изажым вигак палышым, нуно толыныт улмаш, ялт öрын колтышым. Пелашемланат каласышым.
Вес тӱня дене кыл уло, мый тидлан ӱшанем.
Роза А.
Советский район.
Советский район.