Тошто воштончыш

Тылеч ончыч юзо вийлан ӱшанен омыл, еҥ-влакын шинчаштлан коеш манын шоненам. Шукерте огыл шонымашем вашталтын.

Пел ий ончыч пелашем дене у пачерым нална. Тушто мемнан деч ончыч кова илен.

Пачерым шукертак олмыктен огытыл. Сделкым ыштымеке, ме вигак тушко илаш куснышна. Эн ончыч обойым вашталтышна, тошто пӧртарвер деч утлышна. Лач коридорышто кечыше кугу воштончышым гына кодышна.

Шарнем, икымше гана уналыкеш толмекыже, авалийшем «Света, луктын шу тиде тошто воштончышым, тушто колышо еҥын чонжо илен кертеш, тиде сайлан огыл» манын каласен ыле. Мыйже тидым шотеш налын омыл. Окса лиймеке, вес воштончышым налына, кызытеш тидат йӧра манын шоналтенам.

Илаш пурымеке, иктым ыштет, весым тӧрлет. Кумыл нӧлталтше, вет ынде меат шке пачеран улына. Катя ӱдырланна – вич ий. Тудат пеш куанен. Тӱрлӧ мотор вургемжым чия да воштончыш ончылно пеш пӧрдеш.

Иктаж кок арня гыч Катялан шучко омо-влак кончаш тӱҥальыч. Тудо йӱдым лӱдын, кычкырен помыжалтын. Ӱдыр ала-могай шоҥго кува, эҥыремыш, осал пий-влак нерген ойлен.

Мый шекланаш тӱҥальым: Катя коридорышто воштончыш воктеч эртен кайымыж годым молгунамсе семын койышланыл ок шого, тудын могырыш огешат ончал, писынрак эртен кая. Икана Катям кидше гыч воштончыш дек вӱден кондышым. «Ончал, могай тый мотор улат!» – маньым. Ончыч тыге ойлымемлан тудо куана ыле, а ынде вуйжым кумык сакен. «Воштончышышто осал кокай ила, тудо эре вурседылеш», – манын да шортын колтен.

Тылеч вара воштончышым простынь дене леведынам. «Эрла пелашем паша гыч толешат, тиде антиквариатым луктын кудалтена», – шоналтенам. Тудо йӱдым, кухньыш вӱдым йӱаш ошкылшемла, кӱварыште кийыше простыньым шекланышым. Уэш сакымем годым воштончышышто Катям ужым. Лӱдмем дене тӧршталтен колтышым, воктенемже ӱдырем укес. А воштончыш кӧргыштӧ Катя яндам перкала да шортеш.

«Авай, авай, тудлан ит ӱшане, мый тыште улам!», – тудын йӱкшӧ шеҥгелнем шоктыш. Савырнен ончальым – чынак, ӱдырем шога. Уэш воштончыш могырыш вуем савыральым да тушто шоҥго кувам ужым. Ӱпшӧ товаҥше, шинчажым карен, мыланем пуйто ала-мом ойлаш толаша.

Тудо йӱдым ме мӧҥгыштӧ мален ышна керт. Пелашемын аваж дек кудалынна. Эрлашыжым эрдене пелашем да аваж дене пырля пачерыш толна. Воштончышым простынь дене вӱдылын, пырдыж гыч налын шогалтенна. «Ынде тудым шинчал дене эрыктыман да еҥ коштдымо верыште мландыш урен пыштыман. Воштончышым пудырташ ок лий, уке гын тусо осал вий лектын кертеш», – манын тудо. Ме тыгакак ыштенна.

Эркын дене пачерыште илышна шотыш толын. Катя ончычсо семынак веселаҥын. Коридорыш вес воштончышым сакенна. Варарак пошкудо-влак дене палыме лийынам. Нуно мемнан пачерыште илыше кува нерген каласкаленыт, пуйто тудо эре вурседылын, локтен моштен.

Светлана.

Йошкар-Ола.

Интернет гыч налме фото.