22 июль – Мумо ӱзгарын кечыже. Лудшына-влак иктаж-кунам иктаж оҥай арверым муыныт мо? Туддене мом ыштеныт?
Андрей Шурыгин, Йошкар-Ола:
– Шукерте гына огыл шоныдымын-вучыдымын кидышкем пеш оҥай арвер логале. Ик палымем мыланем ала-кунам пеш чапланыше «Нива» журналын 1904 ийысе номержым конден. Ты журналыште текстым пӱтынек кириллице дене возымо. Журналым шергалшемла, лаштык коклаште 1898 ийысе, Николай II кугыжа вуйлатыме жапысе, 1 теҥгеаш кугыжаныш кредит билетым муынам. Кызыт тиде арвер мыйын личный коллекцийыштем аралалтеш. Шонем, лишыл жапыште тудым Тимофей Евсеев лӱмеш Национальный тоштерын фондышкыжо пуэм, вет мый шкежат тыштак пашам ыштем.
Анжела Шулепова, Йошкар-Ола:
– Мый У Торъял районысо Изаньга ял гыч Кугу Лумарий марте школыш йолын коштынам. Корно чодыра гоч эртен, а тушто шӱк ора пеш шуко лийын. Тудын коклаште икана шинчамлан тошто утюг пернен, тушко эше ломыжым оптен гладитленыт. Но ом шарне: тудым ала школ тоштерыш пуэнам, ала мӧҥгӧ наҥгаенам.
Христина Полтасова, Йошкар-Ола:
– Изиэм годым ме бавай (кова) дене пакчаште мотор тошто алгам муынна ыле. Тудым поген пыштенна. Шуко ий эртен, йӧратыме баваем шукертак вес тӱняшке каен. Но Морко район Весшӱргӧ ялыш шочмо суртышкем пӧртылмеке, шинчашкем эре саде алга перна. Тунам вигак йӧратыме баваем порын шарналтем, южгунам шинчавӱдат толеш. Кызытат тиде алга эре изи чонем ырыкта.