Кугу Ачамланде сарын участникше, Марий Элын шочшыжо Сергей Григорьевич Сысуевын дневникшым Моско оласе Сеҥымаш тоштерыште ончыктат.
Йошкар-Оласе Историй тоштер «Сеҥымаш деке корно» кугу экспозиций пашаш ушна. Тудо Кугу Отечественный сарыште Йошкар Армийын салтакше-влакын подвигыштлан пӧлеклалтын. Ончерым 9 май деч ончыч почаш палемдыме. Тушто салтак-влакын фронтышто ыштыме летописьыштым ончыкат. Мемнан кундем гыч С.Г.Сысуевын дневникшым тушко колтымо.
Сергей Григорьевич – гвардий старший лейтенантын кавалеристше. 1941 ий августышто армийыш каен. Октябрьыште икымше кугу бойышто кредалын. Кечывалвел, Закавказский, Северо-Кавказский, Белорусский фронтышто тушман-влак ваштареш шоген. Тудын вӱдымӧ дневникыштыже сарысе фото, газетла гыч заметке-шамыч улыт.