Йошкар-Олаште 14-15 июльышто «Музейные маршруты России» форум эрта. Тудо Э.Сапаев лӱмеш Марий кугыжаныш опер да балет академический театрыште почылтын. Россий Федерацийын Тӱвыра министерствын тений эртараш палемдыме 12 тыгай мероприятий гыч нылымшыже лач Марий Эллан логалын.
‒ Тыште эртарымым ме шукертак вученна. Марий Элыште музей илыш ойыртемалтеш, ончыктышашнат шуко уло. Тыгодымак ме моло йӧн денат палыме лийнена, умбакыжат вияҥнена, ‒ манын республикысе тӱвыра, печать да калык-влакын пашашт шотышто министр К.Иванов.
Форум тӱҥ шотышто тоштер пашаеҥ-влакын тачысе илышышт дене палдараш, ончыко вияҥшаш корным рашемдаш эртаралтеш. Музей-влак кызыт экспонат дене палдарыше кудо семын гына огыт ыште, тачысе жаплан келшыше техникым кучылтын, шкешт деке толаш тӱрлӧ семын калыкым кумылаҥдат. Мутлан, Татарстан гыч тоштер пашаеҥ-влак эртыше илышыш куснаш виртуальный йӧным муыныт: посна программе дене пашам ыштыше ӱзгарым шинчалык семын чиктен, эртыше илышыш логалаш темлат, айдеме ожнысо уремла дене «ончен коштын», тунамсе транспортыш шинчын кудал кертеш да молат.
‒ Тиде тыгак лийшаш: кызыт тоштерыш толшо еҥ ончен гына ынеж эрте, шкежат тусо илышыште «лияш» йӧрата. Сандене тыгай корным мыланна утларак кычалман, ‒ каласен Россий Тӱвыра министерствын тоштер-влак да тӱжвал коммуникаций департаментшын директоржо Елена Харламова.
Эдуард Иманаев.
