Звенигово район Тошнур ялыш Карелий кундемысе Петрозаводск оласе кугыжаныш консерваторий гыч студент-влак унала пурен лектын кайышт.
Нуно Йошкар-Олашке «Михаил Мурашко унала ӱжеш» фестивальыш толыныт ыле, 1 апрельыште Сеҥымашын ХХХ идалыкше лӱмеш тӱвыра полатыште мастарлыкыштым ончыктеныт. А вара Озаҥ олаш каяш тарваненыт ыле. Но Тошнур тӱвыра пӧрт пеленысе «Алан» ансамбльын вуйлатышыже А.Д.Дружининын унала ӱжмекше, тушко миен толде кертын огытыл. Вет ты кок коллективлан шуко вере вашлияш пернен: Озаҥыштат, Петрозаводскыштат, Йошкар-Олаште Пеледыш пайремыштат.
Тыгак Йошкар-Олаште эртыше Марий калык погыныш делегат-влак дене Карелий гыч Алевтина Войтович толын ыле. Тудо Шернур районышто шочын-кушкын. Марий калык погынышто Алевтина Аркадьевналан «Марий Эллан – 100 ий» медальым кучыктеныт. Тыгайрак мемнан землякна Карелий мландыште ила.
Валерий Самиков.