Патрульно-постовой службын полицейскийже-влак преступлений лийме верыш ик эн ончыч миен шуыт, кечывалымат, йӱдымат ола уремлаште общественный порядкым, лӱдыкшыдымылыкым тергат. Тений патрульно-постовой службылан 100 ий темеш.
Садлан ты гана лаштыкнан унаже – Россий МВД-н Йошкар-Оласе управленийжын патрульно-постовой службыжын посна батальонжын наряд-влак управлений группын изирак инспекторжо, полицийын кугурак прапорщикше Д.Е.Спиридонов.
Чӱчӱжын корныж дене
Дмитрий Евгеньевич Советский посёлкышто шочын, изиракше годым ешыже Морко посёлкыш илаш куснен. Кызыт пӧръеҥ Медведево посёлкышто ила. Полицейский лияш чӱчӱжӧ Иван Александрович кумылаҥден. Тудын формым чиен коштмыжым рвезе изинек кугешнен ончен. Д.Спиридонов 2005 ийыште службыш толын. 2016 ий марте Йошкар-Ола уремлаште патрулироватлен. А вара отделений командирлан тыршен. Ӱмаште тудым наряд-влак управлений группын изирак инспекторжылан шогалтеныт.
Нарядлан ямдылат
Должностьшылан келшышын, Дмитрий Спиридонов нарядым патрулированийлан ямдыла: пашаеҥ-влаклан экипировкым, вооруженийым пуа, инструктажлан ямдыла да уремыш патрулироватлаш колта. Тылеч вара полицейский-влакын службым эртымыштым тергат, кушто улмыштым эскерен шогат. Полицейский-влаклан уремыште еҥым, автомобильым але велосипедым базыште тергаш кӱлеш гын, радиостанций але телефон дене йыҥгыртен рашемдаш полшат. Южгунам дежурный часть вызовым налын ок шукто, тыгай годым наряд управлений группо шке полицейскийже-влакым палемдыме верыш колта. Вызов-влак тӱрлӧ пурат: ешыште вате-марий коклаште вурседылмаш ылыжын але иктаж-могай преступлений лийме нерген еҥ-влак йыҥгыртен ойлат.
Мут кучаш шогалтат
– Полицейский семын ятыр ий патрулироватлымеке, пеҥгыдын каласен кертам: ты службышто лӱддымӧ лийман, кеч-могай ситуацийыште шкем кучен, еҥ-влак дене кутырен моштыман. Формым чийымеке, полицейский роботыш ок савырне, тудо вет айдемак кодеш, садлан калык дене кутырымо годым порылык нерген мондыман огыл: весе дене порын кутырет гын, тудат тыланет тыгакак вашешта. Туге гынат тӱрлӧ еҥ вашлиялтеш. Йӱшӧ еҥ гын эре торжан мутлана. Полицейский-влаклан утларакшым лач тыгай еҥ-влак дене пашам ышташ перна. Калыкын тӱшкан погынымо верыште кочывӱдым йӱаш ок лий (тидлан лӱмын вер-влак улыт: кафе, бар, пурлмывер, ресторан) гынат, южо еҥлан тиде чарак огыл. Правам пудыртымо тыгай еҥым наркологийыш тергаш наҥгаена, тушечын – полиций пӧлкаш. Тыгай административный правам пудыртымылан 500 теҥге штрафым тӱлыктат.
Калыкын тӱшкан погынымо верыште тамакым шупшаш ок лий, шукын тиде законымат пудыртат. Тыгак моло изирак осал паша, кевытыште сатум шолыштмаш дене чӱчкыдын тӱкнаш перна. Еҥ-влак интернетыште еҥ деч сатум ужалыме сайтыште велосипедым налыт, южыжо шолыштмо кок ораван транспорт дене кудалыштмыж нерген огешат шоналте, – пашаж нерген каласкала Д.Спиридонов.
Смене годым патрулироватлаш лӱмын маршрут ышталтеш, полицейский кушко шона, тушко каен ок керт. Мутлан, олан рӱдӧ ужашыжым икмыняр маршрутлан пайлыме, кажне тыгай верыште автопатруль порядкым терга. Южо вере преступлений чӱчкыдынрак ышталтеш, але, мутлан, калык погынымо верыште: автовокзалыште, пазарыште – полицейский-влак утларак жапым эртарат. Пайрем годым да каныш кечылаште уремыште калык поснак шуко. Нине кечылаштат полицейский-влаклан паша ешаралтеш.
Патрулированийыш пашаеҥым шкетшым огыт колто – коктын але кумытын пырля пашам ыштышаш улыт. ППС службышто ӱдыр-влакым чӱчкыдын вашлияш лиеш. Пырля патрулироватлаш кок ӱдырым огыт шогалте, тидат ик правиллан шотлалтеш.
Каныш кечынат
– Службыш толмем почеш кугу нелылык шижалтын огыл, документ дене пашам ышташ, рапорт ден протоколым чын возаш тунем шуаш жап кӱлын. Осал пашам ыштыше икымше еҥым ом шарне, но икана Сеҥымаш бульварыште кыртменак куржталаш пернен – коллегем дене коктын шолыштшо еҥым поктенна. Тыршымына арам лийын огыл – осал пашам ыштышым кученна.
Д.Спиридонов каныш кечынжат профессиональный тӱткылыкшӧ нерген ок мондо. Теве шукерте огыл Йошкар-Оласе ик кевытыш пурен. Лекшыжла, омса воктене чӱчырнен шинчыше пӧръеҥым шекланен, кидыштыже – телефон. Саде пӧръеҥ воктене кок рвезе шогылтын. Дмитрий ик мутымат пелештен огыл, автомашинашкыже лектын шинчын да эскераш тӱҥалын. Икмыняр жап гыч кок рвезе кевыт гыч лектын да воктенысе кудывечышкыла ошкылын. Д.Спиридонов почешышт кудалын. Рвезе-влак дек миен, нунышт куржын утлаш тӧченыт. Полиций пашаеҥ коллегыже-влакым йыҥгыртен ӱжыктен. Рвезе-влак саде пӧръеҥын телефонжо ден банк картыжым шолыштыныт улмаш.
Д.Спиридонов шке паша вержым вашталтыме нерген ик ганат шонен огыл. Ойлымыж почеш, тудлан калык дене пашам ыштыме куаным конда. Ешыже пӧръеҥ дене кугешна. Кандаш ияш Кирилл эргыже ачажым службыж нерген каласкалаш чӱчкыдын йодеш, шкежат «Полицейский лийнем» манын ойла.
Авторын фотожо.