Угарман кундемысе Тоншай поселкышто Марий Мер каҥаш президиумын заседанийже эртен. Погынышо-влак ончылно тусо марий-влак шке илыш ойыртемышт нерген каласкаленыт, пашашт дене палдареныт.
Угарман мландыште 6 тӱжем наре марий ила манын палемдат, 2 тӱжем наре Тоншай кундемыште улыт.
Кум районыштыжат Марий автономий уло, нуно 15 ий ончыч ышталтыныт. Тоншай районышто кугу пашам Вячеслав Теркин шукта, «Лекшы выд» (памашшинча манме семын) да «Мариечка» ансамбльышт уло.
Тонкин районышто Сергей Петров, Шаран велне Ирина Алтаева чолга марий семын тыршат. Марла мутланат, иктеш погынен, тӱрлӧ пайремым эртарат. Тоштерым почыт, проект паша дене этнокультур рӱдер семын ыштыме корным ойырат.
Шке жапыштыже автономий Угарман олаштат лийын, но кызыт уке, уэш почаш шонат. Нижний Новгород гыч Анатолий Семятнев тидын нергенак ойлыш. Кызыт тудо изирак тӱшка дене погынен, тӱрлӧ пашам шукташ тыршат. Шкеже Анатолий самырык, марла мутлана.
Икманаш, тыршат, пашам ыштат, ӧрдыж кундемыште марий-влакын тыгай чолгалыкышт куандара.
Вячеслав Теркин Тоншай кундемысе Кугу Ашката ялысе клуб-тоштерым почын, грант конкурс окса дене куымо кум станокым олмыктен-тӧрленыт, марий кудым тоштер семын келыштареныт. Йошкар-Ола гыч мийыше-влак туштат уна лийыныт. 
