Кодшо арнян Йошкар-Оласе 32-шо №-ан школышто «Герой моего народа» республикысе конференций эртаралтын. Ӱдыр-рвезе-влак шке тукымышт але землякышт нерген оҥай докладым лудыныт. У Торъял район гыч участник Родион Небогатиков «Миша — артиллерист» пашаж дене колыштшо-влакын кумылыштым савырен. Рвезе тӱрлӧ конкурслаште чолгалыкшым ончыкта. Сайын тунемеш, спорт дене кылым куча, баян дене устан шокта.
Родион У Торъял район Токтарсола ялын шочшыжо. 9-ше класс марте Онар лӱмеш Токтарсола школышто тунемын. Кызыт У Торъял посёлкысо кыдалаш школышто 10-шо классыште шинчымашым пога.
– Эрик Сапаев лӱмеш сымыктыш школышто баян классым тунем пытаренам. Кызыт гармонь семым лукташ тыршем. Тидлан сымыктыш школын туныктышем Алевтина Александровна Куклина кумылаҥден. Тылеч посна кумшо ий посёлкысо спорт школыш греко-римский кучедалмаш дене заниматлаш коштам, – палдара Р.Небогатиков.
Родион жапым айда лийже эртараш ок йӧрате. Йӧн улмо годым конркуслаш, конференцийлаш кумылын ушна, шымлыме пашам возаш йӧрата. Кок ий Москошто эртаралтше «История местного самоуправления» конкурсышто вийжым терген. Ик ганаже призовой верым налын. А тений октябрьыште марий тунемше Российын тӱвыра рӱдолашкыже – Санкт-Петербургыш — миен коштын. Тушто Родион «Молодые стратеги» конкурсышто шке проектше дене палдарен. Пашаже районышто колым ончен куштымо да тидлан верысе пӱям кучылтмо дене кылдалтын. «Ачам дене коктын колызо улына. Ачамак проектым ямдылаш полшен. Жюри комиисий пашамым сайлан шотлен да кокымшо вер дене палемден», – ойлыш рвезе.
Р.Небогатиков «Марий патыр», «Ший талешке» конкурслаште, Яналов да Колумб лудмашлаште ятыр гана усталыкшым ончыктен. Кум гана Марий самырык тукым слётышто, кок гана Финн-угор йоча-влаклан тӱнямбал лагерьыште, Марий юнкор слётышто лийын.
– Кум ийыште тӱрлӧ сынан мероприятийыште участвоватлымемлан кӧра тений февраль-мартыште «Артек» тӱнямбал лагерьыш логалынам. Тушто участник-влакым марий поэзий дене палдаренам. Шкежат чон йодмо почеш почеламутлам возкалем. Шымлымаш конференций-влакын пайдаже кугу шонем, сандене тушкат эре ушнаш тыршем. 6 ноябрьыште «Герой моего народа» конференцийыш толынам. «Миша – артиллерист» пашам Кугу ачамланде сарын ветаранже, Совет Ушем Герой Михаил Лебедевлан да СВО-н участникше Михаил Петуховлан пӧлеклалтын. Нуно коктынат артиллерист лийыныт, коктынат эл верч уло вийын шогеныт. Шолышто тунемше йоча-влак СВО-н участникше-шамычлан серышым возенна. Мо оҥай, мыйын серышем Михаил Петуховлан логалын улмаш. Тудо шочмо верыш эмлалташ толмыж годым, школыш пурен, да чыла туныктышо, тунемше ончылно таумутан серышым кучыктен. Мылам тидыже кугу куан да чап, – палдарыш Родион.
Р.Небогатиков ончыкшым кӧ лийнеже эше ок пале, но иктым раш каласыш: «Мый марий улмем дене кугешнем. Марий йылмым, марий мутым умбакыжат пеҥгыдын арален, переген наҥгаяш тӱҥалам».
Еш альбом гыч налме фото.