Шошо. Лум, вӱдыш савырнен, урем мучко йоген вола. Тудым ынде лач корем лопышто гына ужаш лиеш. Пушеҥге укш-влак коклаште кайык йӱк шокта. Нунат шошо толмылан куаненыт. Теве изи кайык йогышо вӱдыштӧ йӱштыл лекте. Маша тудым ужын шыргыжале.
Пытартыш йыҥгыр йӱк. Ӱдыр чонышто куан, вет тудо вашке шочмо суртшо гыч лектын кая. Маша институтыш тунемаш пураш шонен, но баллже ситен огыл. Документшым налын да училищышке поварлан экзаменым сдатлен.
Идалык вашке эртен кайыш. Дипломым налын, Маша оласе ик столовыйыш пашаш пурыш, йолташ ӱдыр-влак дене пырля пачерым айлен илаш тӱҥале.
Ик кугарня кастене Маша шочмо ялышкыже каяш тарванен. Автобусышто рвезе дене палыме лийын. Нуно корно мучко тӱрлӧ нерген кутырен каеныт. Теве ӱдырын ялышкыжат миен шуыныт. Рвезе дене чеверласен, Маша автобус гыч лектын, мӧҥгӧ велкыла ошкыльын.
Ялыште каналтымеке, Маша автобус дене олашке мӧҥгеш кудале. Корно мучко тудо еҥ-влакым эскерен, ала Витям ужам манын шонен.
Вес канышлан ӱдыр мӧҥгыжӧ каен кертын огыл, мероприятийлан кӧра шуматкечынат пашам ышташыже логалын. Паша деч вара Машам йолташ ӱдыржӧ дискотекыш каяш ӱжын. Танцплощадкыште весела, ӱдыр-рвезе-влак шукын улыт.
Еҥ-влак коклаште Маша вучыдымын палыме рвезым ужын. Куанымыж дене тудын деке куржын мийышат, шинчажым кидкопаж дене петырыш. Витя ӱдырын кидшым кучен, савырнен шогале да шыргыжалын пелештыш: «Маша?! Кузе тышке логалынат? Мый тыйым тиде верыште ик ганат ужын омыл». «Пашалан кӧра ялыш каен кертын омыл, сандене каналташ тольым. Тыште пеш весела улмаш. Марий муро-влак могай сылнын йоҥгат! Эсогыл мурызо-влакымат сценыште ужаш лиеш», – вашештыш Маша.
Дискотеке жапыште ӱдыр-рвезе вашла адресыштым каласышт, эше вашлияш кутырен келшышт.
Тиде кастене, малаш вочмеке, Маша Витя нерген шуко шонен кийыш. Могай рвезе? Сай але уда? Ала тиде – йӧратымаш?
Кеҥеж вашке эртен кайыш. Шыже толын шуо. Тиде гана тудо пеш ыш куандаре: эре йӱр, лавыра, кечыжат пыл лоҥгашке шылеш. Шыже почеш йӱштӧ теле шуко ыш вучыкто. Шем мландым ош лум вашке леведе. Кече ончалеш гынат, уремыште йӱштӧ. Кажне йол тошкалме еда лум кычыр-кочыр шокта. Теве У ий толын шуо. Таче Маша ден Витян сӱанышт. Пайремым нуно оласе ик кафеште эртарышт. Оръеҥ кумалтышым пуэдыш, олмешыже кӧ оксам, кӧ пӧлекым кучыктыш. Пайрем моткоч сайын эртыш.
Маша ден Витя олаште пачерым айлен илаш тӱҥальыч. Ик ий гыч Ваня эргышт шочо. А эше ик ий гыч ешыште умылыдымаш лектедаш тӱҥале. Самырык вате-марий ойырлымашке шуыч.
Ойырлымылан пел ий эртыш. Маша тыгаяк ойырлышо вес пӧръеҥым вашлие, тудын пелашыжат вес ӱдырамаш дене ушнен. Но когыньыштынат весе дене илыш шот ыш лий. Вурседылмаш, мыскылымаш суртыштышт чӱчкыдын йоҥгеныт.
Маша, йочажым налын, аваж деке ялышке илаш кайыш. А тиде жапыште Витя пашам ышташ Москваш кудалыштын, тудат ӱдырамаш деч ойырлен улмаш.
Ванялан кум ий теме. Ик кечын Маша эргыж дене пырля олашке сатум наледаш кудале. Чыла пашам пытарымеке, нуно автобусыш пурен гына шуктышт, Маша Витям ужо. Пӧръеҥ йоча воктеке толын шинче да пелештыш: «Ванька, могай кугу лийынат, чылт ават гаяк коят». Витя корно мучко Москошто пашам ыштымыж нерген, а Маша ялыште илымыж нерген каласкалышт.
Ӱдырамаш умылен: эрге йочалан ача кӱлеш, сандене Витян «Айда уэш ушнена» манын каласымыжлан тореш ыш лий. Нуно уэш олаш илаш кусненыт. Суртоза эше икмыняр жап Москоштак пашам ыштен, вет эргым йол ӱмбак шогалташ окса кӱлын. А Маша кочмыверыш пашаш пурен. Ик ий гыч ешыште у куан: ӱдыр шочын.
Витя ден Машам мый пиаланлан шотлем. Вет вате-марий ваш-ваш йӧратат, пагалат, умылен моштат. Адакшым нуным эргышт да ӱдырышт куандарат.
Кидышке пиал толын гын, тудым аралыман. Пиал – илыш.
А Маша ден Витян тыгай пӱрымашышт.
Р.Степанова, Йошкар-Ола