Кугурак класслаште тунеммына годым йолташ ӱдырем дене урок-влакым коден кошташ кумылан лийынна. Мемнан ик эн йӧратыме верна тошто шӱгарла ыле. Тушто XVIII курымласе скульптур-влакымат ужаш логалын. Тусо кумдыкышто пӧртым, аллейым, модшо йоча-шамычым, вольыкым кӱтӱш лукшо кова-влакым, коляскым шӱкышӧ авам ончыктымо.
Йӱран ик шыже кечын йолташ ӱдырем дене шӱгарлаште коштынна. Тунам аллей-влак пустаҥше лийыныт. Ик корно савыртышыште ковам вашлийынна. Тудо мемнан ӱмбаке ончалын да порын шыргыжалын. Меат ваштарешыже шыргыжалынна да корнынам умбакыже шуенна. Икмыняр йолтошкалтышым ыштымеке, кова деке уэш савырнен ончалынна. Тушечын кузе шикшалтмынамат огына шарне, туге писын чымыктенна.
Ты кова кеҥеж тувыр да ош шовыч дене шоген. Тыгак тудын ик ӱп пырчыжат нӧрышӧ лийын огыл. А вет уремыште тунам йӱр талын оптен. Тылеч вара шӱгарлаште перныл коштмым чарненна. Тетла урокымат кодымо огыл.
Лидия Р.
Шернур посёлко.