Марий калыкын календарьыштыже кажне ийын 7 апрельым Тер кудалтыме кече манын возымо.
Тидыжым марий-влак кызыт пешыже огыт пале. А теве кум ий ончыч Пошкырт кундем Мишкан район Чорай селаште Тер кудалтыме кечым пайремленыт. Тунам тудо Кугече арня дене шотлан толын. Мо оҥайже: пу тер дене мунчалташ шоненыт, но Чорай кундемыште тудым муын огытыл, вет яллаште иктат имньым огеш ончо. Туге гынат йоча-влакын издерыштым налын, тӱрлӧ семын ӱчашеныт, модыныт, юарленыт. Тылеч посна икте-весе дене таҥасымаште вӱдварам, совлам да моло арверым кучылтыныт.
Калык пале
♦ Тер кудалтыме кечын марий йӱлам кучышо-влак мелнам кӱэштыт.
♦ Тиде кечын нимогай пашам ышташ ок йӧрӧ, ӱдыман да кусарен шындыман огыл.
♦ Тер кудалтыме кечын кылмыкта – эше латкок кече тер корно лиеш.
