Май эркын мучашке лишемеш, вашке кеҥеж толеш. Тыге шукын отпускыш каят, канаш тӱҥалыт. Тений кеҥежым кузе эртараш шонеда?
Светлана Иногородцева, клуб пашаеҥ:
– Ме, тӱвыра пашаеҥ-влак, кеҥежым эре пашам ыштена: ял пайрем-влакым эртарена. Теве 1 июньышто Звенигово районысо Чуваш-Отар ялыште «Акатуй» пайрем лиеш. Тушко ме «Волушка» ансамбль дене пырля каена. А 29 июньышто шкенан Ӱлыл Памъялыште ял пайремым эртараш ямдылалтына. Вет тудлан тений 160 ий темеш. Программе кумда. Еш нерген выставкым чумыраш, концертым ончыкташ шонена.
Кеҥежым ялыште канаш йӧратем. Ялна деч шым меҥге тораште Трояры чуваш ял уло. Тушто пеш мотор, курыкан, сӧрал вер. Ты верым ончал савырнал кумыл уло.
Шыжым отпускыш каем. Тунам мӧҥгыштак шогылташ тӱҥалам.