8 апрельыште Военный комиссариат пашаеҥ-влакын кечышт палемдалтеш. Ты кечын Марий Эл Республикысе военный комиссариат шошо призывым эртарыме шотышто пресс-конференцийым эртарен.
Тений граждан-влакым военный службыш колтымо паша ончычсо призыв семынак коронавирус инфекцийын шарлен кертмыжым шотыш налын эртаралтеш. Республикысе веле огыл, тыгак районласе 14 да ола округласе 3 призывной комиссий-влак пашам ышташ тӱҥалыныт. Ты сомылым оласе да муниципальный образованийлам вуйлатыше-влак виктарат.
– Шошо призыв пагытыште коронавирус инфекций шарлен ынже керт манын, военный комиссариатыште, районласе призывной пунктлаште да республикысе сборный пунктлаште медицине пост-влак улыт да пӧлемлаште дезинфекций эртаралтеш. Тылеч посна призывник-шамычлан ойырымо автотранспортыштат санитарий шотышто чыла паша шукталтеш.
Кажне призывник ПЦР-диагностике йӧн дене тергалтеш, а сборный пунктыш толмекышт, иммуноглобулин шотышто тестым эртат. Военный комиссариатын пашаеҥже-влак коронавирус ваштареш прививкым ыштеныт, – каласкалыш Марий Эл Республикын военный комиссарже Юрий Аксёнов.
Марий Элыште апрель-июльышто военный службыш 700 утла еҥ кайышаш. Призывник-влакым войскалаш апрельын кокымшо пелынже колташ палемдыме. Марий Элысе призывник-влак Рӱдӧ, Касвел да Эрвел военный округлаш логалыт. Частьыш мийымеке, нуно кок арня карантиныште лийыт. Кече радам дене келшышын, призывник-влак проста (Интернет деч посна) мобильный телефон дене пайдаланен кертыт.
– Марий кундем гыч кайыше рвезе-влак шотышто нунын службым эртыме верласе командир-шамыч деч чӱчкыдын таумутым налына. Тидыже самырык тукымым республикыштына военно-патриотический шӱлышеш воспитатлалтмыштым ончыкта, – ешарыш Ю.Аксёнов.
Пресс-конференцийыште тыгак республикысе Россий следдственный комитетын Марий Элысе пӧлкажын юстиций капитанже Николай Яшметов, Марий Элысе прокурорын полышкалышыже, юстицийын советникше Екатерина Сычёва да граждан-влакым военый службыш ямдылыме да налме шотышто военный комиссариатын отдел вуйлатышыже Вячеслав Фоминых лийыныт. Нуно военный службо да призыв компаний шотышто ятыр йодышым каҥашеныт.