Телым казам сайын пукшаш манын, кечеш 1 кило деч шагал огыл (2,5-3 кило) чоштыра шудым пуыман. Вӱташте шогышо кугу казалан телым ашнен лукташ 500-550 кило шудо кӱлеш, самырыклан – 320 кило. Шурным да моло кормам шудо дене варен пуыман. Тидыже пагарыштлан, кочкышым шулыктарыме системыштлан пеш сай.
Тыгак нунылан куэ, тополь, вӱдуа выньыкым пуаш келшен толеш. Телым каза-влак кечеш 3-5 тыгай выньыкым кочкын сеҥат.
Ушменым, пареҥгым, ковыштам да пакчасаска деч кодшым пукшат. Пареҥгым шолтыман да 1-2 кило дене пукшыман, моло вожсаскам, тыгыдемден, свежам пуыман. Тыгак казалан шинчал кӱлеш. Шокшо вӱдым йӱктыман.
Нуно йӱштыштат илен кертыт. Туге гынат телым вӱташте температур +6…+7 градус шокшо лийшаш, пеленышт казавача-влак улыт гын, эше утларак шокшо кӱлеш. Тиде вольыкым мардеж логалме да ночко деч аралыман, уке гын шодо чер (пневмоний) дене черланен кертеш. Вӱташте юж яндар лийшаш, тудым южаҥден шогыман.
Тыгак телым каза-влакым уремыш лукташ мондыман огыл.