Марий Элым Вуйлатыше Ю.Зайцев Экологический, технологический да атомный надзор шотышто федеральный службын Юл кундемысе управленийжым вуйлатыше А.Мубаракшин дене вашлийын.
Нуно шыже да теле тургымлан ямдылалтме пашан лектышыже, республикысе промышленный лӱдыкшыдымылык нерген мутланеныт.
«Ростехнадзорын йодмыжым шуктымо, предприятий-влак паспортым налыныт. Туге гынат тачысе кечылан пӱсӧ йодыш-шамыч шотышто пашам умбакыже шуена. Вес ийланат палемдыме паша нерген каҥашыман», – ойлен Ю.Зайцев.
Марий Элыште шокшым пуымо тургымлан шуко пачеран 5206 пӧртым, 542 котельныйым, 699,5 меҥге кужытан тепловой сетьым, 2655,8 меҥге водопроводный да 1130,2 меҥге кужытан канализаций сетьлам ямдылыме. Шокшым пуымо тургым республикыште штатный режим почеш пашам ышта.
Д.Речкинын фотожо.