Кызыт самырык-влакым ончетат, телефон деч посна иленак огыт кертыс. Урем дене ошкылыт ма автобус дене кудалыт – кидышт гыч огыт мучыштаре, йырваш ончалаш вуйыштымат огыт нӧлтал. Шукерте огыл ик палымем тидын шотышто ик оҥайым ойлыш. Каласкалымыж семынак возем.
Паша деч вара автобус дене кудалам. Ончыл сиденьыште самырык мужыр шинча, иктаж 17-18 ияш улыт. Пеш ӱчашат. Ӱдыр йолташыжым телефонлан шуко жапым ойырымыжлан шылтала. Рвезыже «туге» я «уке» гына манеш, кутыраш ок ярсе, телефоным чот эскера, темдыштеш.
Вашке мыйын остановкем, садлан верем гыч кынельым, омса векыла тарванышым. Мый денем пырля саде мужырат лекташ ямдылалтын. Ӱдыр почешрак кодын. Автобус гыч тыгай черет дене волена: рвезе, мый, ӱдыр. Рвезе автобус гыч лектат, телефон деч вуйжым нӧлталде, омса могырыш шола кидшым шуялтыш, ӱдырлан лекташ полшынеже. Мый ӱдыр могырышкыла савырнышым, тудлан шинчам пӱяльым, рвезылан кидем шуялтышым. Тыге кидшым кучен, автобус гыч лектым. Ӱдыр почешем волыш, пыкше воштылмым чыта. Рвезе тугак кидем кучен шога, телефон деч ок ойырло. Икмыняр секунд гыч эркын вуйжым нӧлтале. Шинчаончалтышна вашлиймеке, койышланенрак каласаш тӧчышым:
– А тый тыматле, поро улат (вес кидем дене ӱпем тӧрлатышым). Тый декет але мый декем каена?
Мемнан деч ик-кок ошкыллан ӧрдыжтырак ӱдыр таҥже шога, мӱшкырым кучен воштылеш. Рвезе кидшым мучыштарыш.
– Тӱткырак лияш кӱлеш, йолташ, – манам. – Уке гын кӧ пала, мо лийын кертеш вес гана.
Мый савырнен ошкыльым. Ӱдырын воштылмыжо кужун шоктыш.
Икте-весыланда жапым ойыраш ида чамане.
Геннадий.
Медведево район.
Пагалыме лудшына-влак. Илышыштыда шыргыжалаш таратыше иктаж томаша лийын гын, редакцийыш серышым возен колтыза.