Йошкар-Олаште теле кас кузе эрта манын мый ик кастене уныка-влакем дене уремышке лекна. Косомольский урем дене эртен, олан тӱҥ паркышкыже пурышна. Тӱнӧ йӱштӧ огыл гынат, парк кӧргыштӧ калык шагал ыле. Концерт эртаралтме верлаште йӧршеш тымык лийын, обозрений тыртыш воктенат икмыняр еҥ веле шогылтыныт. Калык коштмо корныла пелен шинчын каналташ ыштыме теҥгыллаштат нигӧ шыш кой. Нуно йокрокын койыныт. Паркын рӱдӧ верешыже марий илыш-йӱлан ик лончыжым ончыктышо скульптуро гыч гына тӱмырзын чурийже веле веселан койын. «Теве, час, паҥгаже-влак дене сем-ӱзгаржым пералта, да калык тудын йыр тыманмеш погына»,- манын шонымашым луктын. Но тудо чоя, шӱвырзӧ-йолташыжын весела сем семым лукмыжым вучен. Воктенже понар-влак шып гына волгыдым «шавен» паркысе пушеҥге-влак дене ик йӱк лукде мутланеныт. Йырваш шып. Каныме верышке пурмо вер воктенсе «Амбар» кочмо-пурлмо, подылмо, шкешотан каналтыме вер гычат йӱк-йӱан палышлан шыш солно. Лачак ала могай шокшо кочкышын, очыни тудо тамле, пушыжо веле нерым изиш «чыгылтен». Пенгыде парк савареш пижыктен шындыме М.Шкетан лӱмеш театрын рекламный щитше гыч «Еҥ марий-вот марий» спетакль гыч оҥай фото чоным веселаҥден. Пандемий лӱдыкшылан кӧра, очыни, Ленин лӱмеш площадьштат калык, шуко манаш огеш лий гынат, но погынен ыле. Ятырынже икшывышт, уныкашт дене миеныт да имне терышке,» поездыш» шинчын ёлко йыр кудалыштыныт. Изи машиналште, ньога-влак кататленыт.
Тӱҥ ончалмаште, мыйын шонымаште, у ий каныш кече-влак кызытсе пагытлан, келшышын эртеныт. Вес ий могай лийме нерген, каласаш але ондак. Но сайлан ӱшанымаш йомын огыл. Весела, чынже денак пайрем кумылан кече-влак мемнан деке угыч, товатат, пӧртылыт.
