3сентябрьыште элыштына Терроризм ваштареш кучедалме кечым кажне ийын палемдат. Ты кечын кызытсе Российын историйыштыже эн шӱлыкан да ойган событий – Беслан оласе 1-ше номеран школышто терракт — лийын.
Заложник-влак террорист-шамычын кидыштышт кум кече лийыныт. 3 сентябрьыште Российысе спецподразделений-влакын еҥышт школысо зданийым штурм дене налыныт. Ты операцийыште моткоч шуко сотрудникын ӱмыржӧ кӱрылтын, нуным лӱйкален пуштыныт. Шучко терракт чылаже 350 еҥын илышыжым налын, тушечын – 186 йочан. Ты кечылаште элыштына илыше кажне еҥ мом чытен да мыняр шинчавӱдым йоктарен, шоналташат неле.
Терроризм ваштареш кучедалме кечылан элыштына да кундемыштына тӱрлӧ акций ден мероприятий-влак лийыныт. 2 сентябрьыште Молодежной политике, спорт да туризм министерстве, Йошкар-Оласе Самырык-влакын полатышт, МВД ден ГИБДД пашаеҥ да республикысе волонтёр-влак пырля акцийым эртареныт. Корнылаште тематический ленте-наклейке-влакым пуэденыт. Тидын дене нигӧ да нимо ок мондалт манын ушештареныт.
Ме, Российын чын гражданинже-влак, илышыште тыныслык да икоян улмо верч пеҥгыдын шогена! Кеч-могай национальный але тӱнямбал терроризм ваштареш тореш улына. Ик ой дене вашла келшен, умылен, полшен илена гын, терроризмым чактарен да сорлыклен кертына!