Чодыра пожар станцийлан тӱрлӧ техникым «Экологий» нацпроектын «Сохранение лесов» регионысо проектше почеш налыт. Тидлан федеральный бюджет гыч 38,8 млн теҥгем колтымо. Туддене кум пожарный да ныл грузовой машинам, тыгак бензопилам да воздуходувкым налаш палемдыме.
Тылеч посна 8 чодыра пожар станцийыш оборудованийым, снаряженийым да инвентарьым налаш Марий Эл Республикын резерв фондшо гыч 29,2 млн теҥгем ойырымо. Ты окса дене кӱкшӧ давлениян 19 установкым, 14 мотопомпым, 7 тӱжем утла метр напорный пожарный рукавым, 11 беспилотникым, 56 радиостанцийым, вӱдлан да йӱлышӧ-шӱрымӧ материаллан 100 атым налме. Тидын нерген Марий Элым Вуйлатыше Ю.Зайцевлан пӱртӱс ресурс, экологий да йырым-йырысе кумдыкым аралыме министр А.Киселев каласкален.
Россий МЧС-ын Рӱдӧ управленийжын Марий Элысе управленийжым вуйлатыше В.Шангин палдарен:
– Кодшо ийыште республикыштына 1170 пожар лийын, тышеч 221 пожарже – кукшо шудо йӱлалтымылан кӧра. Тӱҥ амалже – еҥ-шамычын титакышт.
2023 ийыште кукшо шудым йӱлалтымылан административный правонарушений шотышто 71 протоколым возымо. Ятыр ий эскерыме почеш республикыштына пожар лӱдыкшӧ жап апрельын кокымшо-кумшо декадыштыже тӱҥалеш. Пожар лийын кертме эн лӱдыкшӧ пагытлан май ден август шотлалтыт.
Чодыра пожар 98 населённый пункт воктене талышнен кертеш. А тушто 100 тӱжем утла еҥ ила. Чыла вере пожар подразделений-влакым пеҥгыдемдыме, пожарный мотопомп ден ате-влак улыт. Кажне ийын пожар ваштареш ешартыш сомылым шкутат: кумдыкым эрыктат, минерализованный полосам ямдылат.
Ю.Зайцев республик ончылно шогышо ик эн тӱҥ задачылан лишемше пожар лӱдыкшыдымылык тургымлан ямдылалтмым шотлаш палемден. Тудын мутшо почеш, чодыра пожар дене кучедалмаште автопаркым уэмдыме сомыл пайдам пуа да жапыштыже шукташ полша.
Эльвира Терентьева.