Паша деч каналташ да шӱм-чон поянлыкым ешараш манын, Кораксола тӱвыра пӧртна верысе калыкым театрыш каяш кумылаҥдымым шке паша кышкарышкыжак пуртен.
Кодшо тургымышто ялыште илыше-влакым М.Шкетан лӱмеш театрыш вич гана намиенна гын, ты тургымышто але кокымшылан веле мийышна. А мо эн оҥайже: ты гана марий спектакльым ончаш ятыр ий театрыште лийдыме але ик ганат театрыш пурыдымо еҥ-влакым кумылаҥденна.
Январь мучашште «Кавасе Алаша» спектакльын премьерже лийын. Тиде спектакль Кугу Ачамланде сарыште сеҥымылан 80 ий теммылан пӧлеклалтын. Калык шыҥ-шыҥ погынен. Ме, Кораксола ялыште илыше Роза Иванова, Алевтина Иванова, Елена Григорьева, Яраҥсола гыч Нина Егорова, театр пӧрдемыште чон канен спектакльым ончен толна. Моткоч чот келшен.
Алевтина Иванова ден Нина Егорова икымше гана М. Шкетан лӱмеш театр пӧрдемыш пуреныт. Тыгай кугу куат дене мӧҥгышкышт пӧртылыныт, ойлен мошташ шомакат ок сите. Кузе уке гын, вет кугу сценыште шкенан землякна-влакым, Сергей Данилов ден Эдуард Яковлевым, ужыныт. Спектакль мучко шинчаштышт кугешнымаш тул йӱлен. А тачысе саманыште шагал еҥже шке кундемын талантан айдемыж дене кугешнен мошта. «Ынде Марий самырык театрыш Любовь Купсольцевам ончаш кайышашак ыле» манын палемдышт икымше гана театрыш мийыше Н. Егорова ден А. Иванова. Тыге сайын коштын толмылан уэш пачаш тау мутым ойлышт.
«Айдеме ош тӱняшке унала гына толеш», – маныт. А тудын чурийыште куан тулым ужаш, чонжо гыч ташлен лекше йывыртымашыжым шижаш манын, ик гана театр пӧрдемыште марий спектакльым ончымат сита улмаш Тугеже ме, Кораксола тӱвыра пӧртын пашаеҥже-влак, верысе калыкын шӱм-чоныштышт куан тулым ылыжташ корным кычалын муынна. Тидыже мыланна пеш кугу пиал!
Елена Григорьева, Кораксола тӱвыра пӧрт вуйлатыше.
Снимкыште: «Кавасе Алаша» спектакльын премьержым ончаш мийыше Н. Егорова, А. Иванова, Р. Иванова да Е. Григорьева.