Шукерте огыл Марий Элысе студент-влак отрядын икмыняр еҥже, Оршанке посёлкысо шуко профилян колледжын да МарГУ-н студентше-шамыч, Краснодар крайыш каен. Нуно 8 январь гыч 2 февраль марте Российысе «Орлёнок» йоча рӱдерыште пашам ыштат. Чолга самырык еҥ-влак кокла гыч иктыже – Дарья Кострова.
Дарья – Волжск ола гыч. Школышто тунеммыж годымак тӱҥалтыш класслам туныктышо лияш шонен. Кугурак класслаште тудлан руш йылме ден литератур урок-влак поснак келшеныт. Тиде кок предметым туныктышо Елена Владимировна Ивановам Дарья шкаланже эре пример шотеш шынден. Тудым ончен, ӱдыр туныктышо лияш кумылаҥын.
Дарья тыршен тунемын, дневникыштыже «нылытан» ден «визытан» отметке-влак гына лийыныт. Школысо «Оберег» театральный студийыш коштын. Почеламутым сылнын лудмо да усталыкым ончыктымо моло конкурсышто шкенжым терген да ончыл верыш лектын.
9-ше класс деч вара ӱдыр Оршанке посёлкысо И.К.Глушков лӱмеш шуко профилян колледжыш тунемаш пурен. Кызыт кумшо курсышто «Дошкольное образование» специальность дене шинчымашым налеш.
– Отличнице улам, тӱрлӧ мероприятийыш кумылын ушнем. «Молодая гвардия Единой России» организацийын волонтёржо улам. Ӱмаште «Российын самырык профессионалже-влак» чемпионатыште «Дошкольное образование» компетенцийыште моштымашем тергенам. Сайын тунеммылан да мероприятийлаш чолган ушнымемлан Россий Федерацийысе Правительствын стипендийже дене палемденыт. Ӱмаштак «Идалыкын студентше» национальный премийым налшаш верч Марий Элын чапшым араленам, финалыш лектынам. Тыгак ятыр конкурсыш ушненам, – каласкала студентке.
Д.Кострова спорт дене кылым куча, тудлан поснак волейбол келша. «Студент шошо», «Свежий ветер» да моло усталык конкурсышто шкенжым терга. Дарья наставнический пашам шукта, йоча-влакым декламацийлан (почеламутым сылнын лудмаш) туныкта. Яра жапыште Йошкар-Оласе йоча пайремым эртарыше ик студийыште аниматорлан ышта.
– Колледжыште тунеммем годымак «Вожатый» специальностьым налынам да кеҥежым уло кумылын тиде специальность дене пашам ыштем. «Орлёнок» рӱдерыш каяш мыланем «Россий студент отряд-влак» организаций темлен. Кӱлеш документым ямдыленам, резюмем возенам да корныш тарваненам. Пашам тӱҥалме деч ончыч собеседованийым да туныктымо курсым эрташ кӱлын. Икымше командын вожатыйже улам. Ты командыш кугурак ӱдыр-рвезе-влак чумыргеныт.
«Орлёнок» рӱдерыш пӱсӧ уш-акылан, талантан ӱдыр-рвезе-влак толыт, нуно тӱрлӧ грантым налыныт, Российысе конкурслаште сеҥышыш лектыныт. Лагерьыште туныктымо программат, тӱвыра мероприятий-шамычат нине талантан икшыве-влакым чыла могырымат шуараш келыштаралтыныт. Рӱдерын шке йӱлаже да правилже-влак улыт, нуно йоча-влак коклаште кылым пеҥгыдемдаш эшеат полшат. Рӱдерысе лу лагерь кокла гыч мый «Звёздный» лагерьын «Вега» педагогический отрядышкыже логалынам. Пырля пашам ыштыше вожатый-влак поро кумылан улыт, ме икте-весылан эре полшена, – манеш Д.Кострова.
Колледжым тунем пытарымеке, Дарья «Тӱҥалтыш класслам туныктышо» специальность дене кӱшыл шинчымашым налаш шона. Йоча-влак дене пашам ышташ, нуным туныкташ – тудын йӧратыме пашаже. Д.Кострова гай шке пашам йӧратыше, уста да поро специалист-влак шукырак лийыт гын, пеҥгыдын каласен кертына: элнан ончыкылыкшо – ӱшанле кидыште.
Д.Кострован альбомжо
гыч налме фото.